Жил бүр долдугаар сарын сүүлчээс эхлэн гэдэсний халдварт өвчин нэмэгдэх хандлагатай байдаг. Тодруулбал, энэ үеэр сургууль, цэцэрлэг завсарлах, нийтийг хамарсан олон үйл ажиллагаа зохион байгуулагддаг. Түүнчлэн үргэлжилсэн бороо орох, үерийн гамшиг зэргээс шалтгаалан гэдэсний халдварт өвчин эрс нэмэгддэг байна.

Энэ талаар ХӨСҮТ-ийн нэгжийн дарга Н.Сувдмаагаас тодруулахад, "Ямар ч халдварт өвчин улирлын болон насны онцлогтой байдаг. Монгол эрс тэс уур амьсгалтай. Урин дулааны улирал богино үргэлжилдэг. Энэ үетэй, гэдэсний халдварт өвчний улирлын үе давхацдаг. Үүн дээр нэмээд эрсдэлт хүчин зүйлсийн нөлөөгөөр богино хугацаанд өвчлөлийн тоо эрс нэмэгддэг. Үүний нэг нь үерийн асуудал юм. Жил ирэх тусам үерийн эрсдэл нэмэгдсээр байна. Мөн хүүхдүүдийн амралт, аялал зугаалга, баяр наадамтай холбоотойгоор хүмүүсийн бөөгнөрөл ихээр үүсдэг тул гэдэсний халдварт өвчний тохиолдол их бүртгэгддэг гэж үздэг.

Гэдэсний халдварт өвчнөөс урьдчилан сэргийлэх бүрэн боломжтой. Иргэд амьдралынхаа хэв маяг, дадал зуршлыг өөрчлөх, мэргэжлийн байгууллагуудын өгсөн зөвлөмжийг зөв хэрэглэж хэвших шаардлагатай байна.

Гэдэсний халдварт өвчинд бүх хүн өртөх эрсдэлтэй байдаг. Эх уурхай, дамжих зам, өртөмтгий бие махбод гэсэн гурван хэлхээ хоорондоо холбогдож байж халдварт өвчин батлагддаг. Тиймээс эх уурхай буюу өвчтэй хүнтэй бохирдсон хоол хүнс, амны зам, бохир гараар холбогдох замаар өртөмхий бие махбодь буюу бүх хүн өртөх боломжтой. Гэхдээ гэдэсний халдварт өвчин зонхилон бага насны хүүхдүүдэд тохиолддог.

Ялангуяа тав хүртэлх насны хүүхдүүд илүүтэй өвдөх эрсдэлтэй.

Гэдэсний халдварт өвчинд цусан суулга, сальмонеллез, Е коли буюу гэдэсний савханцрын халдвар, энтеровирусын халдвар, гепатит А буюу халдварт шар зэрэг өвчин багтана. Гэдэсний халдварт өвчний онцлог нь өндөр хоруу чанартай цөөн тооны бичил биетэн (нян, вирус) хүний биед орсон тохиолдолд өвчлүүлэх боломжтой бөгөөд эдгээр өвчин үүсгэгч нян вирус нь халдварт өвчтэй хүн, мал амьтнаас гадна орчинд халдварлан улмаар хоол хүнсний зүйл, бохир гар, ус, хөрс, эд зүйлсээр дамжин хүний биед халдварлаж өвчин үүсгэдэг. Гэдэсний халдварт өвчин нь өвчний шинж тэмдэггүй боловч нян тээгчээс шууд болон шууд бусаар дамждаг.

Нян хүний биед ороод 1-3 хоногийн дараа өвчний шинж тэмдэг илэрнэ.

Гэдэсний халдварт өвчний  үед илрэх шинж тэмдэг, хугацаа нь уг хордлогыг үүсгэж буй нянгийн төрөл зүйл, бохирдлын хэмжээнээс хамааран харилцан адилгүй байдаг. Цочмог, 37-40 градус халуурах, бие эвгүйрхэх, толгой өвдөх, хоолонд дургүй болох, бөөлжих, ядрах, гэдсээр базлаж өвдөх, хий дүлэх, ялгадас усархаг, цусан судалтай, залхагтай гарах гэх мэт шинж тэмдэг илэрсэн тохиолдолд  эмч, эмнэлгийн байгууллагад яаралтай хандах шаардлагатай" гэв.