Парисын олимп Сена мөрний эрэг дээр нээлтээ хийхэд ердөө гурван өдрийн хугацаа үлдлээ. Цэнхэр гаригийн спортын ертөнцийн шилдгүүд, домгууд, залуу авьяастнууд загварын нийслэлд хуран чуулж, аваргаа тодруулах учиртай. Олимп дөхсөн үед улс, орнууд нээлтийн ёслолд зогсох туг баригчдаа зарлаж байна. Эх орныхоо тугийг олимпийн нээлтийн ёслолд мандуулж, жагсана гэдэг тамирчин бүрт олдоод байдаггүй эрхэм хүндтэй бөгөөд тун хариуцлагатай ажил билээ. Ийнхүү та бүхэндээ улс орон бүрийн сонирхолтой, анхаарал татсан туг баригчдыг онцолъё.

• ГРЕК – ЯННИС АНТЕТОКУНМПО /САГСАН БӨМБӨГ/

Уламжлал ёсоор олимпийг үндэслэгчид улс орнуудын тэргүүнд жагсана. Грекийн тугийг NBA-ийн супер од, өнөө цагийн шилдгүүдийн Яннис Антетокунмпо болон спорт алхааны шилдэг тамирчин, Грекийн бүх цагийн үеийн хамгийн шилдэг нь гэгддэг Антигони Дрисбиоти нар барих аж. Өнгөрсөн Токиогийн олимпоос эхлэн зарим улс орнууд нэг биш эрэгтэй, эмэгтэй хоёр туг баригчтай болсон билээ. Энэ нь жендерийн эрх тэгш байдлыг хангаж байна гэж үзэж буй.

• ХОРВАТ – БАРБАРА МАТИЧ /ЖҮДО/

Жүдо сонирхогчдын эчнээ таних Барбара Матич улсынхаа туг баригчаар тодорчээ. Тэрбээр эмэгтэйчүүдийн -70 кг-ын жинд дэлхийн аваргаар хоёр удаа тодорч, Токиогийн олимпод тавдугаар байр эзэлсэн билээ. Түүний хамтаар дэлхий, олимпийн аварга, буудлагын нэрт тамирчин Жованни Черногораз тугаа барих аж.

• КУБА – МИХАЙН ЛОПЕЗ/СОНГОМОЛ БӨХ/, ИДАЛИС ОРТИЗ/ЖҮДО/

Куба улсын туг баригчдаар бөхийн спортын амьд домгууд сонгогджээ. Михайн Лопез бол сонгомол бөхийн дийлдэшгүй тамирчин бөгөөд олимпийн аваргаар дөрвөн удаа, дэлхийн аваргаар таван удаа тодорсон эрхэм. Тэгвэл Идалис Ортиз бол жүдогийн эмэгтэйчүүдийн дээд жингийн хүчтэй өрсөлдөгч. Түүний хувьд сүүлийн дөрвөн олимпоос нэг алт, хоёр мөнгө, нэг хүрэл медаль хүртжээ.

• ГВИНЕЙ – НАБИ КЕЙТА/ХӨЛБӨМБӨГ/

Гвиней улсын туг баригчаар Германы Бундеслигийн Вердер Бремен клубын хагас хамгаалагч Наби Кейта байх болно. Өдгөө 29 настай түүний хувьд Английн Ливерпүүл клубын хамтаар хүртэж болох бүхий л цомыг хүртсэн амжилт арвин тамирчин.

• УНГАР – КРИСТИАН ТОТ/ЖҮДО/

Мөн л жүдо сонирхогчдын сайн таних Кристиан Тот эх орныхоо тугийг мандуулах хүндтэй үүргийг хүлээн авчээ. Өдгөө 30 настай тэрбээр Токиогийн олимпоос хүрэл медаль, 2014, 2021 оны дэлхийн аваргаас мөнгө, хүрэл медаль хүртсэн нэгэн. Түүний хамтаар гандболын тамирчин Бланка Биро тугаа барина.

• КОСОВА – ЭГЧ ДҮҮ ГЖАКОВА /ЖҮДО/

Косовагийн жүдо сүүлийн жилүүдэд тун алдартай болж байгаа. Энэ ч утгаараа эгч дүү Гжакова улсын туг баригчдаар сонгогджээ. Эгч Нора Гжакова нь эмэгтэйчүүдийн -57 кг-ын жинд Токиогийн олимпийн аварга болж, 2021 оны дэлхийн аваргаас хүрэл медаль хүртсэн бол дүү Акил Гжакова нь эрэгтэйчүүдийн -73 кг-ын жинд 2021 оны Европын аварга болсон амжилттай.

• ЛАТВИ – НОРИС МЬЕЗИС/3Х3 САГСАН БӨМБӨГ/

3х3 сагсан бөмбөгийн өнөө цагийн хамгийн амжилттай яваа тамирчдын нэг бол яахын аргагүй Мьезис. 3х3 сагсан бөмбөгийн төрөл анх удаагаа олимпийн наадмын хөтөлбөрт багтахад анхны аваргаар нь Мьезис тэргүүтэй Латвийн шигшээ баг тодорч байлаа. Тэгвэл аваргаа хамгаалагч тус багийн амин зүрх Мьезис улсынхаа тугийг барих гэнэ. Түүний хамтаар элсний волейболын тамирчин, Европын хоёр удаагийн аварга Тина Гравдина тугаа барина.

• МОНГОЛ – Б.СЭР-ОД/ХӨНГӨН АТЛЕТИК/, О.ЕСҮГЭН/БОКС/

Зургаа дахь олимпдоо оролцох гэж буй Монголын хөнгөн атлетикийн амьд домог Б.Сэр-Од болон анхны олимпдоо оролцох гэж буй боксын залуу тамирчин О.Есүгэн нар эх орныхоо туг баригчдаар сонгогдсон.

• НИДЕРЛАНД – УОРТИ ДЕ ЙОНГ/3Х3 САГСАН БӨМБӨГ/

Монголын 3х3 сагсан бөмбөг сонирхогчдын хайртай тоглогчдын нэг, үзүүштэй тоглолтоороо алдартай Уорти де Йонг эх орныхоо тугийг барина. Нидерландын 5х5 сагсан бөмбөгт хийдгээ хийж, ид үедээ улсынхаа хамгийн шилдэг нь байсан Уорти сүүлийн жилүүдэд 3х3 сагсан бөмбөгт хүч үзэж, өөрийгөө дэлхий нийтэд таниулж байна. Өдгөө 36 настай түүний хамтаар гандболын тамирчин, дэлхийн аварга Лоис Аббинг туг барина.

• АНУ – ЛЕБРОН ЖЭЙМС/САГСАН БӨМБӨГ/

Цэнхэр гаригийн хамгийн агуу сагсан бөмбөгийн тамирчин олимпийн наадмын нээлтэд эх орныхоо тугийг барин жагсана. Өмнө нь хэзээ ч АНУ-ын сагсан бөмбөгийн тамирчин олимпийн наадмын нээлтэд улсынхаа тугийг барьж жагсч байгаагүй. Тэгвэл ЛеБрон Жэймс түүхийг бүтээж, анхдагч болж чадлаа.

• ФРАНЦ – ФЛОРЕНТ МАНАДУ/УСАНД СЭЛЭЛТ/, МЕЛИНА РОБЕРТ-МИХОН/ХӨНГӨН АТЛЕТИК/

Эзэн орны туг баригчдаар усанд сэлэлтийн чөлөөт сэлэлтийн төрлөөр олимп, дэлхийн аварга болсон Флорент Манаду болон зээрэнцэг шидэлтийн олимп, дэлхийн мөнгөн медальт Мелина Роберт-Михон нар тодорчээ.