Улсын баяр наадамд дөрөв давсан бөхчүүд, манлайлсан сур харваачид гээд нийт 48 хүнээс допингийн сорьц цуглуулсан. Тус сорьцнуудыг Герман улсын Дрезден хотын лабораторид шинжлүүлэв. Эхний ээлжинд 44 сорьцын хариу ирсэн бөгөөд өнөөдөр/2024.07.22/ гурван сорьцын хариу ирж, нэг сорьцын хариу үлджээ. Дөрвөн сорьцыг нарийвчилсан шинжилгээнд оруулах шаардлагатай байсан аж.

Тэгвэл өнөөдөр ирсэн гурван сорьцоос допингийн төрлийн хориотой эм бэлдмэл илэрсэн нь нотлогдож, бөхчүүд хариутайгаа танилцжээ. Хэвлэлүүдийн мэдээлж буйгаар улсын харцага Г.Ганхуяг, аймгийн арслан Г.Хишигбат, цэргийн арслан Г.Жамбалдорж нар хариутайгаа танилцсан гэнэ. Гэхдээ бөхийн салбар хороо, Монголын үндэсний допингийн эсрэг байгууллага, үндэсний бөхийн холбооноос албан ёсны мэдээлэл хийгээгүй байна.

Угтаа допингийн эсрэг үндэсний дүрмийн 14.9 дэх заалт дээр "Үндэсний допингийн эсрэг байгууллага нь “Үр дүнгийн удирдлагын олон улсын стандарт”-ын дагуу тамирчин болон бусад этгээд, энэ дүрмийн 14.2-т заасны дагуу зохих допингийн эсрэг байгууллагад мэдэгдсэний дараа дүрэм зөрчсөн тухай мэдэгдэл хүлээн авсан тамирчин, хориотой бодис, хориотой арга, дүрэм зөрчигдсөн нөхцөл байдал, зөрчлийн шинж чанар болон тухайн тамирчинд түр түдгэлзүүлэх шийтгэл оноосон талаар олон нийтэд мэдээлж болно" гэжээ.

Гэвч одоог хүртэл албан ёсны мэдээлэл хийхгүй байгаа нь хөшигний ард хариуг өөрчлөх, солих, элдэв тохироо хийж байна гэх хардлагыг олон нийтэд төрүүлж байна.

Одоо А сорьцын хариутайгаа танилцсан бөхчүүд В сорьцоо шинжлүүлэх эсэхээ шийдэж, тайлбар өгөх, хамтарч ажиллах, эрхээ хамгаалах зэрэг арга хэмжээг авах ёстой. Үүнээс өмнө бөхийн салбар хорооноос дээрх бөхчүүдийн нэр усыг зарлаж, ямар хориотой бодис илэрсэн гэдгийг нь мэдээллэх дүрмийн заалт бий.