Бангладешийн засгийн газар ахмад дайчдын гэр бүл, үр хүүхдэд төрийн албаны ажлын байрны 30 хүртэлх хувийг олгох шийдвэр гаргасан. Үүнийг тус улсын оюутан, залуучууд эсэргүүцэж жагсаал хийсэн ч төд удалгүй хурцадмал байдалд шилжсэн юм.

Дака хотын гудамж талбайд иргэд цагдаа нарын хооронд мөргөлдөөн болж, олон арван хүн нас баржээ. Жагсагчдын эсрэг нулимс асгаруулагч, үрлэн сумтай буу зэргийг ашиглаж байгаа бөгөөд хөл хорио тогтоогоод буй. Жагсагчдын хувьд ерөнхий сайд Шейх Хасинагийн засгийн газрыг огцрохыг шаардаж байна. Мөргөлдөөн хурцадмал байдалд шилжсэн тул хөл хорио тогтоохоос гадна мобайл болон интернэт үйлчилгээ, сургууль, их дээд сургуулиудыг хаахыг эрх баригчид тушаажээ.

Пакистанаас Бангладешийн тусгаар тогтнолын төлөөх дайнд оролцсон ахмад дайчдын гэр бүл, үр хүүхдүүдэд илүү боломж олгож буй нь хөдөлмөрийн зах зээлийг хувьчлах гэсэн оролдлого гэж иргэд үзэж буй.  Бангладешийг үндэслэгч шейх Мужибур Рахманы охин, ерөнхий сайд Хасина зэрэг хүмүүс нь тухайн ахмад дайчдын холбоотон юм. Төрийн албаны нөөцөлж буй ажлын байр нь аюулгүй байдал хангагдсан, өндөр цалинтай аж.

Австралийн Сидней хотод мөн эсэргүүцлийн жагсаал өрнөж байгаа ба тэнд суралцдаг  29 настай Маруф Хан "Төрийн алба бол үнэхээр сайхан боломж. Гэхдээ 700 гаруй ажлын байрны төлөө 600 мянга орчим хүн өрсөлддөг. Үүний 30 хувийг бусдад шууд олгоно гэдэг бол ялгаварлан гадуурхсан явдал юм" гэжээ.  Бангладешийн ажилгүйдлийн түвшин залуу хүмүүсийн дунд хамгийн өндөр.

Тус улс 170 сая хүн амтай ч  30 гаруй сая нь боловсролгүйн улмаас ажил эрхэлж чаддаггүй.  Эсэргүүцлийн жагсаал долдугаар сарын 1-нд нэр хүндтэй Дакагийн их сургуульд эхэлсэн. Дараа нь эсэргүүцлийн жагсаал газар авсан бөгөөд долдугаар сарын 15-нд эрх баригч Авами лигийн намын оюутны жигүүр болох Бангладешийн Чатра лигийн гишүүд жагсагчид руу дайрсны улмаас жагсаал ширүүн болсон.

Эх сурвалж:CNN