Хятадын Шэньси мужид гүүр хэсэгчлэн нурсны улмаас наад зах нь 15 хүн нас барсан байна. "CCTV" агентлагийн мэдээлснээр, аврах ажиллагаа үргэлжилж байгаа бөгөөд гүүр нурсан гол шалтгаан нь бороо их хэмжээгээр орж, үерлэснээс болсон гэжээ. Мөн Шаньлю хотын Жашуй дүүргийн гүүр хэсэгчлэн нурж, гүүрэн дээр зорчиж явсан 25 машин унасан тухай эрх баригчид мэдээлж байна.

Аврах ажиллагаанд нийт 205 машин, 63 завь бүхий 1630 хүн ажиллаж байна.

Одоогийн байдлаар нийт хэчнээн хүн сураггүй алга болсон нь болон аврагдсан нь тодорхойгүй байна. "CCTV" агентлаг Даваа гаригийн өглөө нэг хүнийг аварч чадсан гэж мэдээлснээс хойш шинэ мэдээлэл өгөөгүй. Тус улсын удирдагч Ши Жиньпин бүх нийтээрээ аврах ажиллагаанд оролцож, сэрэмжтэй байхыг уриалсан. Сүүлийн хоёр сарын хугацаанд Хятадын нутаг дэвсгэрт их хэмжээний аадар бороо орж байгаа бөгөөд үер бууж, хөрсний гулгалт их хэмжээгээр үүсч байна.

Шэньси мужийн хөрш зэргэлдээх Хэнань мужид мөн адил үер бууж, улмаар 100 мянга гаруй хүнийг нүүлгэн шилжүүлсэн тухай тус улсын хэвлэлүүд мэдээлсэн байна. Баруун өмнөд хэсгийн Сычуань мужид өнгөрсөн Бямба гаригийн өглөө үерийн улмаас 10 гаруй хүн амиа алдаж, 29 хүн сураггүй алга болжээ. Эрх баригчдын мэдээлснээр, орон нутгийн цагаар 02:30 цагийн орчимд гэнэтийн үер бууж, олон хүн унтаж байхад байшин, зам, гүүр эвдэрсэн байна.

Эх сурвалж: BBC