Архангай аймагт байрлах “ARA Complex” түм түчигнэж, бум бужигнасан аялагч жуулчдын их хөлийн газар болжээ. “ARA Complex”-т орой бүр Монголын сор болсон хамтлаг дуучид ая дуугаа өргөдөг төдийгүй саяхан The HU хамтлагийнхан “бут авсан” байна.

Дэлхийн цирк, морьтой үзүүлбэр, орон орны бөхчүүд барилдах зэрэг шоу үзүүлбэрүүд ч болдог тул үзэж харах зүйлээр уйдаахгүй аж. Аялагч жуулчдын хувьд асуудал болсоор ирсэн боловсон 00, хоол зэрэг асуудлыг ч нэг дор шийдэж чаджээ.

Иймээс “ARA Complex”-ын энэхүү менежментээс бусад аймгууд мөн санаа авч хөгжүүлбэл, аялагч жуулчдыг татах “бүтээгдэхүүн”-тэй болно гэж жуулчны компаниудын төлөөлөл үзэж байна.

“ARA Complex”-т болж буй шоуг үзэхээр өдөр бүр Улаанбаатар хотоос автобус, автобусаараа аялагч жуулчид ирэхийн зэрэгцээ гэр бүл найз нөхдөөрөө ч зорьж очих  хүмүүс олон болсон аж. Түүнийг дагаад нутгийн иргэдэд түшиглэсэн бизнес ч цэцэглэж эхэлжээ. Зочид буудал, зоогийн газар, гэр буудал нь бүгд хүнтэй. Малчид сүү сааль, хонь малаа нийлүүлээд мөнгө олчихно. Улаанбаатар хот руу явахгүй л бол цагаан идээгээ борлуулах боломжгүй болдог байсан архангайчуудын хувьд “ARA Complex” –ийн хөл хөдөлгөөнөөр гэрийнхээ хаяанаас бизнес хийж мөнгө олох боломжийг бүрдүүлжээ.

Сануулахад, “ARA Complex-“-ийг жилийн өмнө жүжигчин Э.Цолмонбаяр байгуулсан юм.

Г.ХОРОЛ