Улсын харцага Т.Бэгзсүрэн Завхан аймгийн Отгон сумын түүхэн 100 жилийн ойн баяр наадмын бөхийн барилдаанд таарсан хүүхдийг хүчтэй савж, унагаасан нь олны бухимдлыг төрүүлсэн юм. Тэрбээр энэ үйлдэлдээ харамсч, уучлалт гуйжээ. Тэрбээр "Дүү болон дүүгийн гэр бүлээс уйчлалт гуйсан байгаа. Бөхөд хайртай Монголын ард түмнээ бухимдуулсандаа хүлцэл өчье өө. Санамсаргүй, хэнэггүй байдлаасаа болж маш том алдаа гаргалаа" гэж өөрийнхөө цахим хуудсандаа бичсэн байна.

Иргэдийн зүгээс энэ мэт увайгүй үйлдэл гаргасан бөхийн барилдах эрхийг нь хасах хэрэгтэй гэдэг саналыг ч хэлж байсан юм. Улсын харцага Т.Бэгзсүрэнгийн хувьд Ардын хувьсгалын 100, 101 жилийн ойн баяр наадмын хүчит бөхийн барилдаанд зодоглож, тавын даваанд өвдөг шороодсон. Хуулиараа дөрөв давсан бөхчүүдээс допингийн шинжилгээ авахад түүнээс хориотой бодис илэрсэн билээ.

Хуульд заасанчлан барилдах эрхийг нь дөрвөн жилээр хасах шийдвэр гарсан. Харин Т.Бэгзсүрэн энэ шийдвэрийг эсэргүүцэн, Спортын арбитрт гомдол гаргаснаар эрхээ хоёр жилээр хасуулсан.

Т.Бэгзсүрэн харцага тухайн жилийн наадмын өмнө тохой, гуяны булчиндаа бэртэл гэмтэл авсан учир наадамд барилдахын тулд хүчтэй эм тариа хэрэглэсэн гэдэг. Үүнийгээ ч баримт болон гэрчийн хамтаар нотолж чаджээ.