Дэлхийн тэргүүлэх банк, хэвлэл мэдээллийн агентлаг болон агаарын тээврийн компаниуд үйл ажиллагаагаа зогсооход хүрсэн байна. Тодруулбал, Майкрософт компанийн үүлэн технологид доголдол гарсны улмаас АНУ. Их Британи, Австрали, Сингапур, Хонг-Конг, Энэтхэг, Испанийн агаарын тээврийн компаниуд сүлжээгүй болж, нислэгээ зогсоосон. Мөн банкны сүлжээ доголдож, хэдэн тэрбум ам.доллар алдаж болзошгүй аюултай нөхцөл байдал үүсчээ. Их Британид галт тэрэгний үйлчилгээ зогсож, үүсээд буй мэдээллийн технологийн асуудлыг шийдэхээр мэргэжилтнүүд ажиллаж байна.

Майкрософт компанийн мэдээлснээр "Crowdstrike" кибер аюулгүй байдлын программ хангамжийн асуудлаас болж цахим үйл ажиллагаа доголдсон.

Мэдээллийн технологийн доголдол дэлхийн өнцөг булан бүрт нөлөөлж байна. Их Британийн "Sky News" агентлаг энэхүү нөхцөл байдлаас шалтгаалан түр хугацаанд хаагдсан.  АНУ-д Юнайтед, Дельта зэрэг томоохон агаарын тээврийн компаниуд нислэгээ зогсоож байна. Австралид нисэх онгоцны буудал, дэлгүүр, харилцаа холбооны салбарууд цахимаар ажиллах боломжгүй болсон. Майкрософт компани "Crowdstrike"-ийн  үйл ажиллагааг хэвийн болгохоор инженерийн олон тооны баг ажиллаж байна гэж мэдэгдэв.

"Парис 2024" олимпийн наадмын мэдээллийн технологийн салбар мөн адил үйл ажиллагаа явуулах боломжгүй болсон. Германы хоёр том эмнэлэг доголдлын улмаас түр хугацаанд цахим мэдээллийн сандаа нэвтэрч чадахгүй байна. Мөн Аласка мужийн 911 бүхэлдээ холбогдох боломжгүй болжээ.

Энэ нөхцөл байдлаас улбаалан хэдэн сая хүний нууц мэдээлэл алдагдах боломжтой гэж шинжээчид үзсэн.

Эх сурвалж: BBC