Сурагчид бие даалтаараа музей, театр үзэж, нүд, шүдээ үзүүлнэ

Боловсролын сайд П.Наранбаяр анхны тушаалаараа хичээлийн жилийн бүтцийг баталжээ. Хичээлийн жилийн бүтцийг сургуулиудад даруй хүргүүлэх гэнэ. Ингэснээр сургуулиуд бүтэн жилийнхээ тогтмол ажлын төлөвлөгөөг боловсруулан, эцэг эх, сурагчдад эртхэн мэдээлэх боломжтой болно гэдгийг яамнаас мэдээллээ.

Үүний үр дүнд гэр бүлийн амралт, аялал, эцэг эхийн ажлын төлөвлөлтийг эртхэн хийх боломжтой болох юм. Бид хугацаа тулгасан, гэнэтийн цочроосон шийдвэр гаргахгүй байхыг анхаарч ажиллана.

Энэ хичээлийн жилийн төлөвлөлтийн нэг онцлог нь бие даалтыг оруулж ирсэн явдал болно. Бие даалтын хугацаанд музей, театр үзэх, 6 настнуудыг нүд, шүд, зүрх судасны оношилгоо, гамшгийн сургалтад хамруулах зэрэг ажлыг зохион байгуулах гэнэ.

Боловсрол, шинжлэх ухааны сайдаар ажиллаж байсан Л.Энх-Амгалан 2024 оны долдугаар сарын 10-нд залуу сайд П.Наранбаярт тамгаа хүлээлгэж өгсөн. Тамга хүлээлцэх ёслолд 2012-2016 онд салбарын сайдаар ажиллаж байсан, өнөөгийн Засгийн газрын Тэргүүн шадар сайд Л.Гантөмөр оролцсон юм. УИХ-ын ээлжит сонгуульд дэвшүүлсэн мөрийн хөтөлбөрөө хэрэгжүүлэх зорилгоор шинээр эмхлэн байгуулсан Засгийн газар нь Ерөнхий сайд, 22 сайд, 16 яамтай ажиллана. Энэ 16 яамны нэг нь Боловсролын яам юм.