НЭМЭЛТ:

Шүүгдэгч Н.Өнөрцэцэгийг “Нэр бүхий 4 иргэн, 1 хуулийн этгээдийн нэр төр, алдар хүнд, ажил хэргийн нэр хүндэд халдсан илт худал мэдээллийг олон нийтэд тараасан”, “Хувь хүний хуулиар хамгаалагдсан нууцыг олж мэдсэн хүн өөрийнх нь зөвшөөрөлгүйгээр цахим сүлжээ ашиглаж задруулсан”, “Татвар төлөгч хувь хүн, хуулийн этгээдийн удирдах, гүйцэтгэх албан тушаалтан татвар төлөхөөс зайлсхийх зорилгоор их хэмжээний татвар ногдох орлогоо зориуд худал тодорхойлсон, нуусан”, “Татвар төлөхөөс зайлсхийх гэмт хэргийн улмаас олсон хөрөнгө, мөнгө, орлого гэдгийг мэдсээр байж ашигласан”, “Төрийн нууцад хамаарах мэдээ, баримтыг хадгалсан” гэмт хэрэг үйлдсэн гэм буруутайд тус тус тооцож, нийт 4 жил 9 сарын хугацаагаар хорих ялаар шийтгэж, оногдуулсан ялыг нээлттэй хорих байгууллагад эдлүүлэхээр шийдвэрлэв.

Шүүгдэгч Н.Өнөрцэцэгт холбогдох хэрэг нь төрийн нууц болон хүний эмзэг мэдээлэлтэй холбоотой тул хуульд зааснаар шүүх хуралдааныг бүхэлд нь хаалттай явуулсан болно.

Нийслэлийн Прокурорын газраас яллах дүгнэлт үйлдэж ирүүлсэн шүүгдэгч Н.Өнөрцэцэгт холбогдох хэргийн шүүх хуралдааныг 2024 оны 07 дугаар сарын 18-ны өдрийн 13 цаг 30 минутад зарласан.

Уг шүүх хуралдааныг шүүгдэгчийн өмгөөлөгч Б.Баатарсайхан нь “Нийслэлийн Эрүүгийн хэргийн давж заалдах шатны шүүх болон Сүхбаатар дүүргийн Эрүүгийн хэргийн анхан шатны шүүхэд шүүх хуралдаан давхацсан тул хойшуулах” хүсэлтийг ирүүлсэн.

Өмгөөлөгч Б.Баатарсайханаас ирүүлсэн хүсэлтэд дурдсан Нийслэлийн Эрүүгийн хэргийн давж заалдах шатны шүүхийн хуралдаан хойшилсон бол шүүгдэгч Н.Өнөрцэцэгт холбогдох хэргийн шүүх хуралдааныг 2024 оны 07 дугаар сарын 01-ний өдөр хойшлуулж, тухайн өдрөө дараагийн шүүх хуралдааны товыг 2024 оны 07 дугаар сарын 18-ны өдөр хийхээр зарласан бөгөөд өмгөөлөгчийн Сүхбаатар дүүргийн Эрүүгийн хэргийн анхан шатны шүүхэд зарлагдсан хурал нь уг хурлаас хойш зарлагдсан хурал байсан ба өмгөөлөгч О.Батсүх нь ямар нэгэн баримтыг шүүхэд ирүүлэлгүй, шүүх хуралдаанд хүндэтгэн үзэх шалтгаангүйгээр хүрэлцэн ирээгүй тул шүүгдэгч Н.Өнөрцэцэгийн өмгөөлөгч нарын зүгээс хэрэг хянан шийдвэрлэх ажиллагаанд саад учруулсан гэж үзсэн болно.

Мөн шүүх хуралдаанд шүүгдэгчийн өмгөөлөгч Д.Оросоо нь хүрэлцэн ирсэн тул шүүгдэгч Н.Өнөрцэцэгийн өмгөөлүүлэх, хууль зүйн туслалцаа авах эрх нь хангагдсан гэж дүгнэн өмгөөлөгч Б.Баатарсайханаас гаргасан шүүх хуралдааныг хойшлуулах тухай хүсэлтийг хүлээн авахаас татгалзаж шийдвэрлэсэн.

Улмаар шүүх хуралдааны хэлэлцүүлэг эхлэхээс өмнө шүүгдэгч Н.Өнөрцэцэг нь өмгөөлөгч Д.Оросоогоос өөрийн хүсэлтээр татгалзаж байгаа талаарх хүсэлтийг шүүхэд гаргасан ба шүүгдэгч нь өмгөөлөгчөөсөө татгалзах, өөрийгөө өмгөөлөх эрх нь түүний хуулиар олгогдсон эрх тул түүний хүсэлтийг хүлээн авч, хуульд заасан заавал өмгөөлөгчтэй оролцох тохиолдол биш учир шүүх хуралдааныг цааш үргэлжлүүлсэн болно.

НЭМЭЛТ:

Сэтгүүлч Н.Өнөрцэцэгт шүүхээс 4.9 жилийн ял оноолоо. Тодруулбал, Н.Өнөрцэцэгт холбогдох хэргийн шүүх хуралдаан хоёр хоног үргэлжилж сая /2024.07.19/ 20:00 цагт шүүх шийдвэрээ гаргасан байна.

НЭМЭЛТ:

Сэтгүүлч Н.Өнөрцэцэгт холбогдох шүүх хурал өнөөдөр 09.00 цагаас хоёр дахь өдрөө Сүхбаатар дүүргийн эрүүгийн хэргийн анхан шатны шүүхэд үргэлжилж байна. Шүүх хурал өдөр 13.30 цаг хүртэл түр завсарлаж, одоо үргэлжилж байна. Сэтгүүлч Н.Өнөрцэцэгийн хувьд шүүх хуралд өмгөөлөгчгүй оролцож байгаа юм.

НЭМЭЛТ:

Сэтгүүлч Н.Өнөрцэцэгт холбогдох шүүх хурал өнөөдөр 09.00 цагаас хоёр дахь өдрөө Сүхбаатар дүүргийн эрүүгийн хэргийн анхан шатны шүүхэд үргэлжилж байна. Яг одоо хурал түр завсарлалаа. Н.Өнөрцэцэгийн хувьд шүүх хуралд өмгөөлөгчгүй оролцож байгаа юм.

Тэрбээр "Монголд дуугардаг улс төрийн нам эвсэл, сөрөг хүчин гэж байхгүй болсон. Энэ сөрөг хүчний үүргийг нөгөө хэдэн сэтгүүлчид хийж ирсэн. Намайг өчигдөр, өнөөдөр гээд гурав, дөрвөн өдөр дамнан шүүх юм шиг байна. Намайг төрийн нууц хадгалсан гээд байгаа бол төрийн нууцыг задруулсан дарга сайдыг яагаад шүүхгүй байгаа юм бэ. Миний хэргийг олон нийт мэдэх ёстой учраас нээлттэй шүүх хурлыг явуулаад өгөөч гэдэг хүсэлтийг тавьсан юм" гэв.

СЭТГҮҮЛЧ Н.ӨНӨРЦЭЦЭГТ ХОЛБОГДОХ ШҮҮХ ХУРАЛ ҮРГЭЛЖИЛНЭ

Сэтгүүлч Н.Өнөрцэцэгт холбогдох шүүх хурал өнөөдөр 09.00 цагаас хоёр дахь өдрөө Сүхбаатар дүүргийн эрүүгийн хэргийн анхан шатны шүүхэд үргэлжилнэ. Н.Өнөрцэцэгийн хувьд шүүх хуралд өмгөөлөгчгүй оролцож байгаа юм.

Гурван өмгөөлөгчөөс хоёр нь тодорхой шалтгааны улмаас шүүх хуралд ирээгүй бол өмгөөлөгч О.Батсүхийг шүүх хуралд оролцуулаагүй.

Шүүх процессын талаар сэтгүүлч Н.Өнөрцэцэг “Өчигдөр өндөр өсгийттэй явчихсан, яллах дүгнэлт уншина гээд босоод зогсоочихдог юм байна, 2-3 цаг зогссон байх. Ер нь асуултад хариулна гээд байнга зогсох л ёстой аж.

Чи ийм ийм мөнгө ингэж авсан байна, чи ийм хууль бус мөнгө олсон байна гэхээсээ илүү чи энэ мэдээг яах гэж хийсийнм, яагаад тэр шүүхийн гадаа очоод мэдээлээд шүүхийн нэр төрд халдаад байгаа юм…

Ямар зорилгоор, яах гэж наад мэдээгээ хийсэн юм бэ?

Сэтгүүлч гэдэг мэргэжил хуулийн хүрээнд ямар ч хамгаалалт алга. Миний хувьд олон нийтийн төлөө шударга ёсыг нэхэж сурвалжилга хийж явсан” гэж мэдэгдээд байна.

Түүнийг худал мэдээлэл тараасан, татвараас зайлсхийсэн, төрийн нууцад халдсан зэрэг үндэслэлээр буруутган шүүж буй юм. Сэтгүүлч Н.Өнөрцэцэг төрийн нууцад хамаарахгүй бусад асуудлыг нь нээлттэй шүүх хүсэлт гаргасан ч шүүх бүрэлдэхүүн хангахгүй байгаа юм.