Тус газрын албан хаагчдын хүсэлт, шаардлагыг хүлээн авч, асуудлыг шийдвэрлэх зорилгоор аймгийн Засаг даргын орлогч М.Анхбаяр, Засаг даргын Тамгын газрын Санхүү, төрийн сангийн хэлтсийн дарга Г.Энхтайван, Сайнцагаан сумын Засаг дарга бөгөөд тус газрын ТУЗ-ийн дарга С.Бат-Оргил нар энэ сарын 05-ны өдөр нийт албан хаагчидтай уулзалт хийлээ.

2023 оноос тус байгууллагыг аж ахуйн тооцооны үндсэн дээр үйл ажиллагаа явуулахаар статусыг өөрчилж орлого олох бүх боломжийг нээж өгсөн бөгөөд 2021 оноос жил бүр орон нутгийн төсвөөс олгох татаас санхүүжилтийг нэмэгдүүлж 2024 онд 1,3 тэрбум төгрөгийн төсөв батлагдсан.

Албан хаагчдын цалин хөлс өмнөх онуудаас өссөн боловч бараа бүтээгдэхүүний үнийн нэмэгдэл нь цалингийн өсөлтөөс давсан мөн төрийн байгууллагуудын ижил түвшний ажилчдын цалингаас бага, ачаалал их байдаг нь цалин нэмэгдүүлэх үндсэн шалтгаан болж байгааг тэд хэлж байв.

Хотын өнгө үзэмж, нийтийн ая тухтай амьдрах орчинг бүрдүүлдэг хүнд бөгөөд хариуцлагатай ажил эрхэлж байгаа тус газрын ажилчдын ажиллах орчин нөхцөл, техник хэрэгсэл, цалин хөлсний асуудал дээр аймгаас анхаарч дэмжиж ирсэн бөгөөд цаашид ч цалин хөлсийг үе шаттай нэмэгдүүлэх төсвийн нөөц боломжийг судалж шийдвэрлэхээ илэрхийлж, тус газрын удирдлага, албан хаагчдыг ажлын гүйцэтгэл, чанараа сайжруулах шаардлагатай байгааг мөн анхааруулав.