Санхүүгийн салбарын бэлгэдэл болсон бухын хөшөөний талаар санал сэтгэгдлүүд олон нийтийн сүлжээнд хөвөрч байна. Энэ хүрэл хөшөөг уран бүтээлч Ж.Цолмонхүү, Д.Анхбаяр, Д.Ариунболд, Б.Лхагважав, Н.Саруул-Оргил, О.Жамьяантүвдэн нарын таван уран бүтээлч 30 хоногийн дотор бүтээжээ.

Хөшөөний талаар уран бүтээлч Д.Анхбаяраас тодруулахад "Хүрэл цутгуураар урласан бухын хөшөөг таван уран бүтээлч 30 хоногийн хугацаанд хийж, дуусгасан. Зохиомжийн хувьд монгол бэлгэдлээ шингээж, тоост хорвоогоос тасарч байгаа бухыг дүрсэлсэн. Манай баг өмнө нь Чингис хаан музейн орой дээрх алтан шонхор, хаалгыг урласан. Тэр үед бас л хүмүүс янз бүрээр шүүмжилж л байсан. Хөшөө бүтээх хөрөнгө мөнгийг арилжааны банкуудаас хандив цуглуулж босгосон. Яг хэдэн төгрөгөөр бүтээсэн мөнгөн дүнг хэлэх боломжгүй" гэв.

Улаанбаатар хотын бага тойруугийн уулзварт бухын хөшөөг байршуулсан бөгөөд энэхүү хэсгийг “Санхүүчдийн талбай” гэж нэрийджээ. Уг бухын хөшөөний урт нь 5.5 метр, өндөр нь 2.5 метр аж.

Энэ жил Монгол Улсад банкны салбар үүсч хөгжсөний 100 жил, Даатгалын салбарын 90 жилийн ой тохиож байгаагаас гадна Санхүүгийн зохицуулагч байгууллага ялангуяа хөрөнгийн зах зээлийн зохицуулагч байгууллага үүсч хөгжсөний 30 жилийн ой тохиож буй юм.