"Шинэ Яармаг"-ын байрыг хямдаар зарж, бусдыг залилахыг завджээ

Монгол Улсын Хөгжлийн банкны өр төлбөрт хураан авсан "Шинэ Яармаг" цогцолбор хорооллын зарим байрыг өөрийн өмч мэтээр иргэдэд ойлгуулж, хямдаар санал болгон бусдыг залилахыг завдсан үйлдэл удаа дараа гараад байна.

Тодруулбал, “Шинэ Яармаг цогцолбор хорооллын 736, 737 дугаар байрнуудаас дуудлага худалдаагаар худалдан авсан байрыг зах зээлийн үнээс хямдаар зарна” гэсэн мэдээлэл тараан, зохиомол байдлыг зориудаар бий болгож, ингэхдээ хуурамчаар бичиг баримт үйлдэн бусдын өмчийг өөрийн өмч мэтээр иргэдийг төөрөгдүүлсэн, залилангийн шинжтэй тохиолдол хэд хэдэн удаа гараад байгаа юм.

Иймээс аливаа гэмт хэргийн хохирогч болохоос урьдчилан сэргийлэх үүднээс Хөгжлийн банкнаас иргэдэд хандан энэхүү сэрэмжлүүлгийг гаргаж байна.

Хэрэв хэн нэгэн Танд “Хөгжлийн банкнаас худалдаж авсан…” гэсэн тодотголтойгоор Шинэ Яармаг, Буянт-Ухаа 1, 2 хорооллоос хямд үнээр байр худалдаж авахыг санал болгосон бол Хөгжлийн банкны Активын бүтцийн өөрчлөлтийн хэлтсийн мэргэжилтний 85020513 дугаарт шууд холбогдон, тухайн үл хөдлөх хөрөнгөтэй холбоотой мэдээллээ баталгаажуулж, нягталсны үндсэн дээр шийдвэр гаргахыг зөвлөж байна.

Хөгжлийн банкны хамгийн том чанаргүй зээлдэгчийн нэг нь “Нью Яармаг хаусинг прожект" компани. Хөгжлийн банкнаас 2015 онд “Шинэ Яармаг” хороолол барихаар 145 тэрбум төгрөгийн зээл авснаас 59 тэрбумыг нь эргүүлэн төлж өдгөө 117 тэрбумын өр үлдсэн гэдгийг албаныхан мэдээлж байсан. Тиймээс 2022 онд "Шинэ яармаг" төслийн барьцаа хөрөнгийг хурааж авах чиглэлийг Ерөнхий сайд Л.Оюун-Эрдэнэ өгч байв.

Энэ талаар тухайн үед Сангийн сайд Б.Жавхлан мэдээлэл өгөхдөө "Хөгжлийн банктай холбоотой чанаргүй зээлийн эргэн төлөлтийн явц долоо, наймдугаар сараас эрч нь буурсан байна. Тийм учраас олон нийтийн хяналтыг өндөр болгож, төрийн өмчийн компаниудтай холбоотой чанаргүй зээлийг төлж барагдуулах тал дээр холбогдох сайд нарт үүрэг өглөө. Мөн Ерөнхий сайд хувийн хэвшлийнхний чанаргүй зээлд хатуу арга хэмжээ авахыг үүрэгдсэн. Тодруулбал, "Эрэл" болон "Шинэ яармаг" төслүүдийн барьцаа хөрөнгийг нь хураах, албадлагын арга хэмжээ авах чиглэл өглөө. Ойрын нэг сарын хугацаанд энэ ажлыг эрчимжүүлэх тал дээр үүрэг өгсөн. Энэ оны нэгдүгээр сараас хойш Хөгжлийн банкинд нийтдээ 510 тэрбум төгрөгийн зээл төлөгдсөн байна" гэдгийг онцолж байв.