Копа Америка тэмцээн энэ жил АНУ-д болж, өнгөрлөө. 48 дахь удаагийн Өмнөд Америк тивийн аварга шалгаруулах тэмцээнд 16 баг өрсөлдсөнөөс финалд Аргентин болон Колумбийн шигшээ багууд шалгарч, 1-0 гэсэн харьцаатай Аргентин хожиж, 16 дахь цомоо өргөв.

Финалын тоглолтын үеэр Лионель Месси шагайндаа бэртэл авч, нулимстай талбайг чөлөөлсөн. Гэхдээ түүнгүйгээр шигшээ баг нь Лаутаро Мартинезын гоолоор хүчтэй өрсөлдөгчөө буулган авлаа.

Колумбийн шигшээ багийн 28 тоглолт дараалан хожигдоогүй байсан цувралыг зогсоожээ.

Энэ удаагийн Копа Америка хэл ам, хэрүүл шуугиан ихээр дагуулж, шүүмжлэлд олон өртсөн. Зохион байгуулалтаасаа эхлээд талбайн зүлэг, бэлтгэлийн талбай, тасалбар, хамгаалалт гээд бүхий зүйлс нь хүлээлтэд хүрсэнгүй.

Финалын тоглолт Флоридагийн 65’300 хүний суудалтай Хард Рок цэнгэлдэхэд болсон ч тоглолт хуваарьт цагаасаа 45 минут хоцорч эхлэв. Шалтгаан нь тасалбаргүй мянга гаруй фанатууд хүчээр цэнгэлдэх рүү орох гэж эмх замбараагүй байдал үүсгэжээ. Хамгаалалтын алба ч ажлаа тааруу хийж, тасалбаргүй фанатууд цэнгэлдэх рүү орж чадсан гэнэ.

Тэгвэл үүнээс гадна цэнгэлдэхийн зүлэг асуудал дагуулсан. Чанарын шаардлага хангаагүй зүлгэн дээр тоглолт зохион байгуулж, олон тамирчид бэртэж гэмтэх эрсдэл дагуулсан аж. Мөн бэлтгэлийн талбай ч шаардлага хангахгүй, тоног төхөөрөмж дутагдалтай байжээ. Үүнээс гадна тасалбарын үнэ тэнгэрт хадаж, үүний улмаас нэг тоглолтыг дунджаар 49 мянган хүн цэнгэлдэхэд үзэж, нийт суудлын 23 хувь нь хоосон байсан гэнэ.

Хамгийн гол нь ирэх 2026 онд хөлбөмбөгийн ДАШТ АНУ-д болно. Гэвч америкчууд хөлбөмбөгийн тоглолт хэрхэн зохион байгуулах учраа одоог хүртэл олоогүй байна гэж шүүмжилж байна. Олон нийтийн цахим сүлжээнд "Америкт дахиж хэзээ ч битгий хөлбөмбөгийн тэмцээн зохион байгуул", "Америкт хөлбөмбөг мөхөж байна", "Мөнгөтэй байсан ч хөлбөмбөгийг ойлгох ухаан алга" зэрэг сэтгэгдлүүд хөвөрч байна.