Дональд Трамп кампанит ажлынхаа хүрээнд Пенсильвани мужид дэмжигчидтэйгээ уулзаж байсан. Гэвч тэр үед зэвсэгт этгээд түүнийг онилсон. Трамп амь эрсдээгүй ч цугларсан олноос нас барсан тохиолдол бүртгэгдсэн юм. Гэнэтийн аймшигт хэргийн дараа АНУ-ын улс төр болон ирэх арваннэгдүгээр сард болох сонгуульд ямар өөрчлөлт гарах нь хачирхалтай юм.

Шинжээчдийн үзэж буйгаар Дональд Трамп илүү хүчирхэг, нөлөө ихтэй нэгэн болох аж. Тэрбээр "Америкийг дахин агуу болгоно" буюу "MAGA" уриагаа илүү олон хүнд түгээж чадах олны анхаарлын гол сэдэв хэдийнэ болсон.

Бүгд найрамдах намын үндэсний их хурал хоёр долоо хоногийн дараа болох бөгөөд тэр үед Трампийн сонгогчдын тоо өссөн байна гэж таамаглаж байна.

Өнгөрсөн Бямба гаригт болсон Трампийг хөнөөх оролдлогын дараа улс төр орвонгоороо эргэсэн тул Жо Байден сонгогчдынхоо саналыг татах шинэ арга зам эрэлхийлэх хэрэгтэй болсон.

Хэдийгээр Трамп баруун чихээ гэмтээсэн ч гэлээ түүнд ашигтай хэд хэдэн шийдвэрүүд гарсан. Жишээ нь, Даваа гаригт Флорида мужийн шүүхээс Трампийн нууц бичиг баримт хулгайгаар эзэмшиж байсан гэх хэргийг хэрэгсэхгүй болгожээ. Мөн түүнд хамаарах дөрвөн хэргийг хэрэгсэхгүй болгосон юм. Гэхдээ тухайн хэргүүдэд өнгөрсөн сард шүүх хурал нь болсон мөнгө хууль бусаар нуусан, мэдээлэл тараахгүйн тулд мөнгө өгсөн гэх хэрэг орохгүй.

Мөн инстаграм, хуучнаар твиттер дээр Трамп хаяг нээж болохгүй гэх хоригийг хэрэгсэхгүй болгожээ. Ингэснээр Дональд Трамп цахим орчинд эргэн ирээд байна.

ТРАМПИЙН СОНГОЛТ

Висконсин муж дахь Милуоки Бакс цэнгэлдэх хүрээлэнд болох Бүгд найрамдах намын үндэсний их хурал дээр Трамп очихгүй гэж шинжээчид таамаглаж байв. Гэсэн хэдий ч Трамп оролцоно гэдгээ мэдэгдсэн бөгөөд "Хөнөөх ажиллагаа миний зорилгод саад болохгүй" гэж мэдэгджээ. Тус хурал дээр Трамп өөрийн дэд ерөнхийлөгчөөр нэр дэвших хүнийг сонгох учиртай юм.

Одоогийн байдлаар Даг Бургум, Марко Рубио, Ж.Д.Вэнс нар хамгийн боломжит хувилбарууд билээ.

Өнгөрсөн Бямба гаригт болсон хэргээс өмнө АНУ-ын шүүх засаглал Дональд Трампийг голчлон "муу хүн" мэтээр дүрсэлж байв. Гэвч хөнөөх ажиллагааны дараа олон нийтийн Трампийг үзэх үзэл тэс ондоо болсон.

Түүнийг зорилгодоо үнэнч нэгэн, мятаршгүй зэргээр сонгогч олон бодох болжээ. Гэхдээ энэ бүхэн урьдаас төлөвлөсөн зүйл байсан гэх хэд хэдэн хүмүүс байгаа ч баримт, нотолгоогүй юм.

Улс төрийн нэр дэвшигчийн амийг хөнөөх оролдлого нь ардчилалд халдаж буйтай адил. Тиймээс Трамп олон нийтийн үзэл бодол өөрчлөгдөж байгаа энэ хугацаанд зан чанараа өөрчлөх үү, эс өөрчлөх үү гэдэг нь чухал.

Ардчилалд халдаж буйд олон нийт дургүйцэх нь ойлгомжтой асуудал бөгөөд Трампийг сайн удирдагч гэж бодож эхэлсэн залуу үеийн сонгогчдынхоо саналыг авахын тулд тэрбээр ялгаварлан гадуурхсан үг хэллэг ашиглахаа болих хэрэгтэй гэж шинжээчид үзэж буй.

Жишээ нь, ерөнхийлөгч асан Обамагийн төрсөн нутгийн талаар Трамп арьс өнгөөр ​​ялгаварлан гадуурхсан үг хэлж байсан. Мөн Нэнси Пелосигийн нөхөр Пол Пелосиги бэртэл авсны дараа Трамп түүнийг шоолж байсан юм. Эдгээр зан чанар, үг хэллэгээ ашиглахгүй байвал Трамп илүү олон хүний саналыг авч чадах магадлалтай.

Түүнчлэн, өнгөрсөн Бямба гаригт болсон хөнөөх ажиллагааг Ардчилсан намын явуулга гэж Трамп мэдэгдэж магадгүй. Гэхдээ мөрдөн шалгах явц үргэлжилж байгаа тул гэмт хэрэгтэн ямар үндэслэлээр Трампийг хөнөөх болсон нь тодорхойгүй байна.

Хэрэв Трамп тус хэргийг гартаа авч, өөрт ашигтайгаар шийдвэрлэж чадвал Ардчилсан нам болон Жо Байденыг дарж чадна.

Өмнө нь 2020 оны сонгуулийн дараа Ардчилсан нам гэмт хэрэгт холбогдсон хүнийг ерөнхийлөгчийн суудалд суулгахгүй гэх хуулийн заалтыг нэвтрүүлэх гэж хичээж байсан ч бүтээгүй. Үүнд Дональд Трамп одоо хүртэл дургүйлхдэг тул хөнөөх ажиллагааг ашиглан Ардчилсан намаас "өшөө" авч магадгүй юм. Бүгд найрамдах намын хувьд аль хэдийн сөрөг хүчнийг энэ хэрэгт буруутгаж эхэлсэн бөгөөд "Х" хуудаснаа "Энэ бол Жо Байдены Трампийг ямар ч аргаар хамаагүй зогсоох гэсэн кампанит ажил" гэж нийтэлжээ.

Эх сурвалж: CNN