Амралт зугаалгын улирал эхлэнгүүт иргэд голын эрэг, ай сав дагуу зугаалдаг. Энэ үеэр усанд осолдож нас барах тохиолдол гарсаар байна. Тухайлбал, өнгөрсөн долоо хоногт Дорнод аймгийн Хэрлэн суманд гурав, Увс аймгийн Наранбулаг суманд нэг нийт дөрвөн иргэн голын усанд живж амь насаа алджээ. Эдгээр амь насаа алдсан иргэд нь 34-60 насны эрэгтэйчүүд байсан бөгөөд усанд сэлэх гэж ороод болон согтууруулах ундаа хэрэглэсэн үедээ гол руу орж, амь насаа алдсан гэдгийг албаныхан хэлж байгаа юм.

Баяр наадмын өдрүүдэд буюу долдугаар сарын 10-15-ны өдрүүдэд Улсын хэмжээнд 22 том хүн, хоёр хүүхэд нийт 24 иргэн усанд осолдож амь насаа алджээ.

Мөн баяр наадмын олон хоногийн амралтаар усанд осолдож нас барах тохиолдол нэмэгддэг аж. Тодруулбал 2019 онд 14, 2020 онд 17, 2021 онд 26, 2022 онд 20, 2023 онд найман хүн баяр наадмын өдрүүдэд усны ослоор нас барсан байна.

2023 онд улсын хэмжээнд 50 иргэн гол, усанд осолдож нас барсан бол 2024 он гарсаар 40 иргэн усанд осолдож нас барсан байна. Эдгээр иргэдийн ес нь бага насны хүүхэд байжээ.

Сүүлийн жилүүдэд иргэд хийлдэг завь, хийлдэг тоглоом зэргийг амарч зугаалахдаа гол, усанд их хэрэглэдэг болсон. Энэ нь голын усанд осолдож нас барах шалтгааны нэг болж байгааг гэдгийг албаныхан анхаарууллаа. Учир нь хийлдэг тоглоомууд нь бассейнд ашиглах зориулалттай аж. Үүнийг голын усанд хэрэглэснээр мөчир болон хад чулуу зэрэгт цохигдон маш хурдан хагардаг байна. Мөн салхинд хийсч хормын төдийд хөмрөх эрсдэл өндөр байдаг ажээ.

Ингэснээр голын усанд осолдох эрсдэлийг нэмэгдүүлдэг байна. Тиймээс ОБЕГ-аас хийлдэг завь, тоглоом зэргийг голын усанд ашиглахгүй байхыг онцгойлон анхаарууллаа.

Мөн Ус цаг уур, орчны шинжилгээний газраас долдугаар сард гэнэтийн хүчтэй аадар бороо орох урьдчилсан төлөвийг танилцуулсан.

Долдугаар сарын 15-ны өдрийн байдлаар Хөвсгөлийн уулсаас эхтэй Эг,  Ерөө, Хэрлэн, Балж, Онон, Хурх, Хангай нурууны өврийн Онги, арын Хойдтамир зэрэг голуудын усны түвшин  5-40см нэмэгдсэн байна. Туул /Лүн/, Балж, Онон, Хэрлэн, Буянт, Ховд, Хархираа зэрэг голууд үерийн түвшинг 5-40см давсан байдалтай байгаа ажээ.

Тиймээс хөдөө орон нутгийг зорихдоо цаг агаарын мэдээллийг цаг алдалгүй авч байх, баталгаат зам гүүрээр зорчих, гол усны ай сав дагуу амарч зугаалахдаа анхаарал болгоомжтой байж бага насны хүүхдэд тавих хараа хяналтаа сайжруулахыг ОБЕГ-аас сануулж байна. Мөн архи согтууруулах ундаа хэрэглэсэн үедээ гол усанд орохгүй байх, гол усны ойролцоо амрахгүй байхыг албаныхан зөвлөв.