Сүүлийн гурван жилийн хугацаанд гадаадын 22 хүн анимэ, манганы хууль бус сайт ажиллуулж байгаад баригдсан гэж тус улсын аж үйлдвэрийн групп мэдэгдлээ. Гадаад дахь контент түгээх нийгэмлэг (CODA) мэдээлснээр, Хятадын эрх баригчид хулгайн сайт ажиллуулж байсан 18 хүний эсрэг арга хэмжээ авахад тусалсан.

Тэдгээр 18 хүний 13-г нь өнгөрсөн нэгдүгээр сараас зургадугаар сарын хугацаанд Жянсу мужийн олон нийтийн аюулгүй байдлын алба мөрдлөгө явуулж, баривчилжээ.

Түүнчлэн, Бразилд хулгайн гэмт хэрэгтэй тэмцэх ажиллагааны үеэр дөрвөн хүн илчлэгдсэн байна. Үүний үр дүнд анимэ, манганы 36 хулгайн вэб сайтыг хаажээ. Японы анимэ, манга дэлхий даяар алдаршиж байгаа энэ үед гадаадын операторууд ашиг олох гэж зөвшөөрөлгүйгээр гадаад хэл дээр орчуулагдсан бүтээлүүдийг  цахим хуудсандаа байршуулж байна гэж “CODA” мэдэгдэв.

Өнгөрсөн 2022 онд хийсэн судалгаагаар хулгайн вэбсайтуудаас болж үндсэн салбарын санхүүгийн алдагдал ойролцоогоор 1.9-2.2 их наяд иен буюу 12-14 тэрбум ам.доллар байна.

Сүүлийн жилүүдэд Франц болон Европын бусад орнуудад үүнтэй төстэй алдагдал батлагдсан гэж “CODA” мэдэгдэв. Тиймээс гадаадын эрх баригчидтай нягт хамтран ажиллаж, хатуу арга хэмжээ авна гэж мэдэгджээ.

Эх сурвалж: NHK