АНУ-ын ерөнхийлөгч асан Дональд Трампийг сонгуулийн сурталчилгааны үеэр буудсан гэх сэжигтний зураг ил болсон байна. Холбооны мөрдөх товчооны мэдээлснээр, тухайн сэжигтэн зүүн Пенсильвани мужид амьдардаг 20 настай Томас Крукс гэгч эрэгтэй болохыг тогтоожээ.

Түүний гэрэл зургийг "Reuters" агентлаг ил болгосон ба 2020 онд сурч байсан ахлах сургуулийнх нь зургийн номноос авсан зураг юм.

“CNN” агентлагийн мэдээлснээр, Крукс ахлах сургуульдаа бусадтай таарч тохирдоггүй, найз нөхөдгүй байсан гэж хамт сурдаг байсан хүн нь хэлжээ. Томас Крукс Пенсильвани мужид Дональд Трампийг хөнөөх гэж завдахдаа өөр нэг хүнийг хөнөөсөн. Тухайн хохирогчийг Кори Комператоре гэдэг бөгөөд гал түймэртэй тэмцэх сайн дурын ахлагч байжээ.

Тэрбээр буун дуу сонссон даруйдаа гэр бүлийн гишүүдээ биеэрээ дарж, хамгаалсан боловч өөрөө суманд оногдсон байна. Пенсильванийн амбан захирагч Жош Шапиро Ням гаригт болсон хэвлэлийн бага хурал дээр “Кори баатарлагаар үхсэн” гэж мэдэгджээ.

Түүнчлэн, 57 настай Дэвид Датч, 74 настай Жеймс Копенхавер нар буудуулсан бөгөөд биеийн байдал нь тогтворжсон байна.

Амь эрсдсэн Комператоре нь Пенсильвани мужийн Питтсбург хотоос 19 км зайд орших Сарвер хотод амьдардаг гэж мужийн цагдаа нар мэдэгдэв. Тэрбээр сайн дурын гал унтраах ажлаас гадна хуванцар үйлдвэрт төсөл, багаж хэрэгслийн инженерээр ажилладаг байжээ.
"Тэр сайн хүн байсан" гэж хөрш Мэтт Ахиллес “Pittsburgh Tribune-Review” сэтгүүлд ярьсан байна. "Бид улс төрийн үзэл бодлын талаар санал нийлээгүй байж болох ч энэ нь түүнийг сайн найз, хөрш болоход нь саад болоогүй юм. Тэр Бямба гариг болгон сүмд явж, хандивын аянд оролцдог байсан. Тэр үнэхээр сайн хүн байсан шүү дээ” гэж Комператорег дурссан байна.

Сонгуулийн сурталчилгааны үеэр Крукс 6-8 удаа гал нээсэн. Үүний нэг нь Дональд Трампийн баруун чихийг оносон юм. Гал нээсэн 20 настай Томас Мэттью Круксыг экс ерөнхийлөгчийг хамгаалах үүрэгтэй Нууц албаны ажилтнууд буудан хөнөөсөн.

Эх сурвалж: BBC