Японы баруун хэсгийн Эхимэ мужийн албаны хүмүүс Мацуяма хотын хөрсний гулгалтын үеэр алга болсон гурван хүн олдсон гэж мэдээлэв. Гэвч тэднийг олох үед нас барсан байсан гэж мэдэгдлээ. Баасан гаригийн өглөөний 04:00 цагийн үед Мацуяма шилтгээны уулын энгэр нурж, байшин, орон сууцны барилгуудад шавар шавхай орж, сүйтгэгдсэн юм. Нурсан талбайн өргөн нь 50 метр, өндөр нь 100 метр байв.

Гал сөнөөгчид болон цагдаа нар Бямба гаригийн үдээс хойш эрэн сурвалжлах, самнах ажиллагаа явуулж, хоёр эрэгтэй, нэг эмэгтэйн биеийг олсон байна. Тэд хөрсний гулгалтаас хойш сураггүй болсон бөгөөд нэг гэр бүлийн гурван хүн байсан нь хожим батлагдсан. Нас барсан хохирогчид 90 гаруй насны эрэгтэй, 80 гаруй насны эмэгтэй, 40 гаруй насны хүү нь байжээ.

Тус бүсийн 22,062 оршин суугчдад дээш түвшний сэрэмжлүүлэг өгсөн. Оршин суугчдыг хувийн аюулгүй байдлаа хангахын тулд яаралтай арга хэмжээ авахыг албаныхан зөвлөж буй. Цаг уурын албаны мэдээлснээр, тус мужид Ням гариг хүртэл түр зуурын бороо орж, аянга цахилгаантай байх төлөвтэй байгаа бөгөөд хөрсний гулгалтаас сэрэмжтэй байхыг ард иргэддээ уриалж байна.

Эх сурвалж: NHK