Оросоос орогнол хүсэгчдийг хилээр нэвтрүүлэхгүй байх хуулийг Финландын парламент өнгөрсөн Баасан гаригт баталжээ. Учир нь 1300 гаруй Орос хүн тус улсад орж ирснээр Хельсинк хилээ хаахад хүрсэн юм. Мөн Сири, Сомали зэрэг орноос олон тооны цагаачдыг хилээр нэвтрүүлж буй замаар цагаачлалыг зэвсэг болгон ашиглаж байна гэж Финланд улс хөрш Оросыг буруутгаж байгаа бөгөөд Кремль үүнийг үгүйсгэсэн. Финландын хувьд Украиныг дэмжиж, “NATO”-д элссэн тул Орос санаатайгаар олон тооны цагаачдыг хил давуулж байна гэж Хельсинк үзэж буй.

Финландын ерөнхий сайд Петтери Орпогийн баруун жигүүрийн засгийн газар мэдэгдэлдээ, уг хуулийн төсөл нь Финландын хүний ​​эрхийн олон улсын амлалттай зөрчилдөж байгаа хэдий ч ирээдүйд ирэх аюулыг зогсооход чухал ач холбогдолтой гэж мэдэгджээ. Орпо санал хураалтын дараа хэвлэлийн бага хурал дээр "Энэ бол Орост өгсөн хүчтэй мессеж. Финланд улс өөрийн аюулгүй байдалд санаа тавьдаг, бид ЕХ-ны хилийн аюулгүй байдалд санаа тавьдаг гэсэн хүчтэй мессеж юм” гэжээ.

Өнгөрсөн зунаас хойш Оросоос 1300 гаруй орогнол хүсэгч хилээр нэвтэрсэн боловч гуравдугаар сараас өнгөрсөн Пүрэв гариг хүртэл шинээр ирээгүй. Парламентын санал хураалтын дараа Финландын хил хамгаалах алба хэлэхдээ, Пүрэв гаригт нэг хүн хууль бусаар хил давж, хилийн харуулд баригдах үедээ орогнол хүсч буйгаа илэрхийлсэн байна. Финланд өнгөрсөн оны сүүлээр ОХУ-тай хуурай газрын хилээ хаасан.

Эх сурвалж: CNN