Орос гаралтай Австралийн хоёр иргэнийг цэргийн мэдээлэл хулгайлж, Москвагийн эрх баригчдад өгөх гэж байсан хэргээр Австралийн засгийн газар буруутгажээ.

Австралийн Холбооны цагдаа (AFP) болон Австралийн Аюулгүй байдлын тагнуулын байгууллага (ASIO) мэдээлснээр, Орос гэрлэсэн хосууд Австралид 10 гаруй жил амьдарсан бөгөөд Пүрэв гаригт Брисбэн хотын хойд захын Эвертон Парк дахь гэрээс нь баривчилсан.  Орост төрсөн 40 настай эмэгтэй армийн жирийн нэгэн албан хаагч байсан бөгөөд Австралийн Батлан ​​хамгаалах хүчинд (ADF) мэдээллийн системийн техникчээр хэдэн жил ажиллаж байжээ. Тэрбээр 2016 онд Австралийн иргэн болсон бөгөөд түүний Орост төрсөн 62 настай, хувиараа хөдөлмөр эрхэлдэг нөхөр нь 2020 онд Австралийн иргэншил авсан байна.

“AFP”-ийн комиссар Рис Кершоу "AFP эдгээр хүмүүсийг Австралийн үндэсний аюулгүй байдлын ашиг сонирхолтой холбоотой Батлан ​​хамгаалах хүчний материалд нэвтрэхийн тулд хамтран ажилласан гэдгийг олж тогтоосон" гэж мэдэгджээ. Одоогийн байдлаар өөр хамтран хэрэг үйлдсэн хүн тогтоогдоогүй байгаа ба мөрдөн байцаалтын ажиллагаа эхний шатандаа явж байгаа аж. Орос гаралтай тухайн хоёр этгээдийг есдүгээр сарын 20-нд анхан шатны шүүх хурал болтол цагдан хорих шийдвэр гарсан байна.
Австралийн Холбооны цагдаагийн газраас баривчлагдсан эмэгтэйг өнгөрсөн жил албан үүргээсээ урт хугацаагаар чөлөө авч, нууцаар Орос руу явсан гэж мэдэгджээ.

"Бид түүнийг Орост байхдаа Австралид үлдсэн нөхрөөрөө дамжуулан албан ёсны ажлын данс руугаа нэвтрсэн гэж үзэж байна" гэж Кершоу хэлсэн. Мөн “Улмаар нөхөр нь батлан хамгаалахын мэдээллийг эхнэр рүүгээ хуулбарлан явуулсан. Тэд энэ мэдээллийг Оросын эрх баригчдад өгөх зорилготой байсан гэж бид үзэж байна” гэжээ.

Эх сурвалж: CNN