Үндэсний их баяр наадам шөвгийн давааны барилдаанаар үргэлжилж байна. Гал гарсан барилдаан үзэхээр наадамчин олон цугласан Төв цэнгэлдэх хүрээлэнгээс сурвалжиллаа.

Төв цэнгэлдэхэд өчигдөр баярын нээлт үзэхээр ирсэн дотоод, гадаадынхан их байсан бол өнөөдөр түүнээс ч их хүн цуглажээ. Учир нь тавын даваанаас хойш дэмжиж байгаа бөхөө шөвгөрч, улсын баяр наадамдаа түрүүлэхийг нь дэмжихээр захыг нь мушгихаар олон хүн хөдөө, хотоос зорин ирсэн байна. Иргэд энэ жилийн наадмыг өнгөтэй, нар, хур тэгширсэн сайхан болж байгааг онцолсон.

Мөн наадмын зохион байгуулалт дэгтэй сайхан байгааг ч хэлж байлаа. Харин өнөөдөр нэг шүүмж дагуулж байгаа асуудал нь цэнгэлдэхийн зүлэг ногоон дэвжээ.

Хүмүүсийн дэмжиж байсан олон бөхчүүд халтирч, тус зүлэгнээс болж жилийн хөдөлмөрөө үнэгүйдүүлсэн нь сэтгэл гонсойлгосон талаар хуваалцлаа. Бусдаар бол зүлэг ногоон дэвжээнээ гарч, улсын баяр наадамд зодоглосон бөх бүр хийморио сэргээж, тэр жилийнхээ хөдөлмөрийг бататгасан гэдгийг цөөнгүй хүн хэлсэн.

Худалдаа наймааны тухайд хоёр дахь өдрөө мөн л цэгцтэй хэвээр байна. Хог багатай, цагдаа, онцгой, эмнэлгийн яаралтай тусламжийн бүрэлдэхүүн бэлэн байдалд ажиллаж, хүүхэд төөрсөн, хүн гэмтсэн элдэв осол аваар гараагүй байна.

НААДАМЧИН ОЛНЫ ХӨЛ 16:00 ЦАГААС ХОЙШ НЭМЭГДСЭН ГЭВ

Хотод байгаа хэн бүхэн үндэсний их баяр наадмаа стадион дотроос биш ч гаднаас нь үзэхийг зорьдог. Энэ жишгээрээ олон хүн гэр бүлээрээ сэрүү буунгуут цэнгэлдэхийг зорин иржээ. Гэр бүлээрээ яваа ихэнх хүн үндэсний дээл хувцасаараа гоёсон нь наадмын сүрийг бүр ч нэмж байлаа. Наадмын өнгө, чанар, цаг агаар сайхан байгаад ч наадамчин олны сэтгэгдэл тэнүүн байна.

Албаныхнаас тодруулахад, цэнгэлдэхийг зорих хөдөлгөөн 16:00 цагаас хойш өссөн гэв.

Энэ нь бөхөд хайртай олон хүн үндэний баяр наадмаараа талбай дээрээс нь зорьж үздэг болохыг илтгэж байна.

Гэрэл зургийг Б.Батцагаан