Баяр наадмын өдрүүдэд зам тээврийн ослын дуудлага нэмэгддэг талаар цагдаагийн байгууллагаас мэдээлсэн. Тодруулбал, өчигдөр буюу долдугаар сарын 11-ний өдөр орон нутгийн замд ноцтой осол гарчээ.

Ослын улмаас хоёр иргэн нас баржээ. Тус осол Сэлэнгэ, Баян-Өлгий аймагт гарсан байна. Одоогоор ослын шалтгааныг мөрдөн шалгаж байгаа аж.

Иймд холын замд гарч байгаа иргэд баталгаат зам гүүрээр зорчиж, техник хэрэгслийн бүрэн бүтэн байдлыг хангахыг зөвлөлөө. 

Баяр наадам дөхсөн ойрын өдрүүдэд хөдөөг зорих хүний тоо өсдөг. Улмаар орон нутгийн замд жолоочид хурд хэтрүүлж, гүйцэж түрүүлэх, согтууруулах ундаа хэрэглэсэн үедээ жолоо барих зөрчил гаргадгаас зам тээврийн осол их гарч буй. Тиймээс тээврийн цагдаагийн албанаас хурдаа тохируулж, замын хөдөлгөөний дүрмээ баримталж, согтууруулах ундаа хэрэглэсэн үедээ жолоо барихгүй байхыг онцгойлон анхааруулж байна. Тээврийн цагдаагийн албанаас нийслэл болон орон нутгийн зарим хэсэгт согтуугаар жолоо барих, эрхийн үнэмлэхгүй, бүрэн бус тээврийн хэрэгсэл, улсын бүртгэлийн дугааргүй тээврийн хэрэгсэлд тогтмол хяналт тавьж ажилладаг. Гэвч иргэдийн ухамсаргүй, хариуцлагагүй байдлаас болж осол гарах нь огт буурахгүй байгаа юм. Тэр дундаа 6-8 дугаар сард. Тиймээс замын хөдөлгөөнд оролцохдоо сонор сэрэмжтэй, анхаарал болгоомжтой байхыг ТЦА-наас зөвлөж байна.