Хурдан морины уралдаан зохион байгуулах салбар хорооны нарийн бичгийн дарга Г.Ялалтаас дараах тодруулгыг хийлээ.

-Зургаан насны морьд уралдахаас ихэнх нь уралдчихлаа. Уралдаан бүрээс маш олон морьд сэрвээний хэмжилтээр хасагдах болов. Уяачдад бол багцаа байх ёстой, гэсэн ч хэмжилтээс болж морь нь уралдаж чадахгүй болж хасагдаж байгаад олон уяач сэтгэл гонсгор харагдана?

-Ардын хувьсгалын 103 жилийн хурдан морины уралдаанд 6 нас уралдахаас 5 нас нь уралдаад байна.  Тун удахгүй дааганы уралдаан эхлэх гээд уяачид маань мордуулж байна.

Маргааш бол Уяачдын баяр, сонгомол, дээд, дунд гэсэн 3 насны уралдаан зохион байгуулагдана. Сэрвээг хасаж байгаа шалтгаан нь уралдааны дүрэмтэй холбоотой юм.

Засгийн газрын баталсан тогтоолд сэрвээний өндрийг заагаад өгсөн байгаа. Нас насаар нь.  Даага, шүдлэнгийн сэрвээ тэдээс тэдэн см байна тэгэхээр төхөөрөмжид ороод хэмжээндээ заагдсан хэмжээг хангахгүй байгаа учраас хасаж байгаа. Хэмжээс бол маш төвөгтэй асуудал. Яагаад гэвэл хэмжээс маань өөрөө амьд биеийг хэмжиж байгаа учраас янз бүрийн хэмжээс гарна.  Мэдээж 1-5 мм-т хасагдаж байгаа бол харамсалтай л үйл явдал. Гэхдээ тухайн хэмжээ маань дүрэмд заагдсан шаардлагыг хангаж чадаагүй бол уралдахгүй л гэсэн үг.

-Хүүхэд нь унасан морь түрүүнд давхиж орж ирсэн ч таван байраар хойшлуулж, зургаад оруулсанд наадамчид их сэтгэл гонсгор байна. Хуучин нэг байраар ухруулдаг байсан хэзээнээс таван байраар ухруулдаг болов?

-Засгийн газрын тогтоолын журам маань ахин шинэчлэгдээд сүүлд гарсан журмаараа 5 байраар ухардаг болсон.

-Уяачид морь унах хүүхдүүдийн бэлтгэлийг хэр хангасан байна вэ. Аюулгүй байдлыг бүрэн хангаж чадсан байна уу. Хурдан морины уралдааны үеэр мориноосоо унаж бэртсэн хүүхэд байгаа юу?

-Наадмын эхний өдөр газар нэлээн хуурай, тоос шороотой байсан. Түүнээс болж их хэмжээний тоос босох, уралдааны явцад үзэгдэх орчин хязгаарлагдах зэргээс болж, уралдааны үеэр хүүхэд мориноос унасан.  Дийлэнхдээ 4-5 хүүхэд  заримдаа 7-8 хүүхэд унасан байгаа. Золоор хүүхдүүд маань гайгүй байгаа.  Хүнд бэртээд ямар нэгэн хугарал үзүүлсэн зүйл одоогоор байхгүй. Ганц нэг хүүхдийн хацар зулгарсан тохиолдол бий. Яаралтай түргэн тусламжийн 103-н ажлын баг шуурхай үйлчилгээ үзүүлээд явж байгаа. Унаач хүүхдийн аюулгүй байдлыг хангах нь маш онцгой ажил. Уралдаанч хүүхдүүдийн хамгаалалтын хувцас хэрэглэлүүдийг чөлөөтэй зарж борлуулах хамтарч ажиллахыг аж ахуй нэгжүүдэд уриалсан.  Гэр бүл хүүхэд залуучуудын газраас энэ ажлыг зохион байгуулсан. Өнөөдрийн хотхонд маань бас хоёр компани ирсэн. Хамгаалалтын хувцсыг зараад хүүхдүүдэд шаардлагатай хэрэглэгдэхүүнийг хангаж өгч байна. Үнэ ханшийн хувьд харьцангуй зах зээлээс бага дүнтэй. Уралдаан болохын өмнө яг бариан дээр хүүхдийн бүртгэлийг шалгахдаа хүүхдийн байгууллага хяналт тавьж, шалгаж үзэж байгаа. Гутал, өвдгөвч, тохойвч бүрэн бүтэн байна уу. Томдсон багадсан асуудлыг нь шалгаад оруулж байгаа. Тийм учраас унасан хүүхдүүдийн гэмтэл бага гарч байна уу гэж бодогдсон.  Сая соёолон насны морьд уралдсан. Сайхан мэдээ нь нэг ч хүүхэд мориноос унаж бэртсэн асуудал гарсангүй.

Б.ЭРДЭНЭЗАЯА, С.НИНЖЖАРГАЛ