"Жахар цам буюу Хүрээ цамын хурал"-ыг Зүүн Хүрээ Дашчойлин хийд жил бүр хурдаг уламжлалтай. Энэ жил аргын тооллын долдугаар сарын 12-15, билгийн тооллын зуны адаг сарын шинийн 06-09-ний өдөр хурах тов гарсан байна. Жахар цамын хурал хурж, сор залах нь хатуу үйлийн эцэс туйл нь бөгөөд аливаа шашны хортон дайсан, гадна дотны бүхий л гай зэтгэр, барцад саад, ад хорлолуудыг дарах утга агуулгатай ханьцашгүй дээд дандрын ёсны Ямандага бурхан ба номыг тэтгэгч сахиус нарыг тахин тэдгээрийн их сүр хүчийг бэлгэдэж цамнан бүждэг зан үйл аж.

Цам үзсэн хүний тэр жилийн хамаг барцад саад нь амирладаг ба цамын зан үйлийг гүйцэлдүүлснээр орон нутагт ган зуд, гай гамшиг амирлаж амар амгалан, өлзий хутаг, аливаа сайн сайхан дэлгэрнэ гэж үздэг байна.

Жахар цамын хурал нь аг тарнийн ёсны гүн утга учир, бэлгэдэлтэй асар их тус эрдэмтэй хурал ном билээ. Энэ үеэр гадар цамаар бүх баг, бүрэлдэхүүн ирэх Даваа гаритт буюу долдугаар сарын 15-нд гадаа бэлтгэсэн цамын талбай дээр гарч бүжиж, сор залах зан үйлийг үйлдэх аж.

ДАНШИГ НААДМЫГ ИРЭХ САРЫН ЭХНИЙ ДОЛОО ХОНОГТ ТОВЛОЖЭЭ

Даншиг наадам Хүрээ цам 2024 шашин соёлын наадам ирэх наймдугаар сард болно. Монголын шашин соёлын тус наадам хамгийн сүүлд цар тахлаас өмнө 2020 онд Гандантэгчинлэн хийдэд болж байсан бол өнгөрсөн 2023 онд Хүй долоон худагт, өргөн дэлгэр болж байв. Уламжлал ёсоор жил бүр өргөн цар хүрээтэй зохион байгуулдаг тус наадмыг урьд жилүүдэд Батцагаан дуганд тэмдэглэж байсан бол 2022 оноос илүү өргөн хүрээнд хүй долоон худагт тэмдэглэх болсон.

Хүрээ цамын хөтөлбөрт морь уралдах, бөх барилдах, сур харвах тэргүүтэй олон үйл ажиллагааг зохион байгуулдаг уламжлалтай.

Энэхүү наадам нь Монголын соёл, шашны зан үйл, уламжлалт хэв шинжийг хадгалсан өвөрмөц онцлогтой наадам. Тиймдээ ч аялал жуулчлалыг хөгжүүлэх нэг боломж гэж үздэг байна. Жил бүрийн наймдугаар сарын эхний долоо хоногт болдог Хүрээ цамын үеэр лам нарын дунд ном хаялцах, мэтгэлцэх, балин тосон урлалын тэмцээн зохиогддог төдийгүй цам харайх, маань татах, Соёмбот туг залах, шашны сүлд дуулал эгшиглүүлэх, шашин соёлын үзэсгэлэн худалдаа зэрэг олон сонирхолтой арга хэмжээнүүдийг зохион байгуулах юм байна.