НЭМЭЛТ: 

Архангай аймгийн Их тамир, Эрдэнэбулган, Хотонт суманд өчигдөр 19.20 цагийн орчимд хүчтэй аадар бороо орсноос үер бууж, улсын чанартай А0603 чиглэлийн авто зам руу элс, хайрга урсаж орсон тул тээврийн хэрэгсэл зорчих боломжгүй болж хөдөлгөөнийг түр хугацаагаар хаасан юм.

Үер буусан авто замд урьд шөнө Архангай аймгийн АЗЗА компанийнхан ажилласнаар өнөөдөр өглөөнөөс зорчих хөдөлгөөн хэвийн болсон байна.

Мөн үерийн улмаас Эрдэнэбулган сумын 01,03 дугаар багийн “Түмэн хотхон”-ы 40,50,54 дүгээр байр, 44, 46, 47 дугаар байруудад үерийн усанд автсан тул Онцгой байдлын байгууллагаас 38 алба хаагч, 3 автомашин, 2 помптойгоор үерийн усыг соруулан ажиллаж байгааг Архангай аймгийн Онцгой байдлын шуурхай алба мэдээллээ.

Хөвсгөл: Үерийн далан сэтэрснийг өндөрлөж, засчээ

Хөвсгөл аймгийн Мөрөн суманд өчигдөр 14.00 цагийн орчимд хүчтэй аадар бороо орсноос үерээс хамгаалах далан сэтэрч, далангийн хоёр талаар байрлах 26 айл өрхийн хашаа гэр байшин усанд автсан юм. Мөрөн сумын онцгой байдлын албаны 31 албан хаагч хоёр ковштой үер буусан газарт ажилласнаар сэтэрсэн даланг сэргээн засварлаж, өндөрлөжээ.

Мөн үүссэн нөхцөл байдалтай холбоотойгоор Мөрөн сумын онцгой комисс хуралдаж, дараах шийдвэрийг гаргасан талаар Хөвсгөл аймгийн Онцгой байдлын газраас мэдээллээ.

Бүх чиглэлд багууд дотоод нөөц дээр тулгуурлаж хүн хүч, техник, тоног төхөөрөмжийн бэлэн байдлыг хангаж ажиллах хуваарь гаргах,

Нэг, хоёрдугаар багийн үерийн далан сэтэрч орсонтой холбогдуулан айл өрхүүдийн зургийг авч баримтжуулан аймаг, сумын Онцгой комисст хүргүүлж ажиллах,

13-р багт ус тогтсон хүнд нөхцөл байдалд Аймгийн цагдаагийн газар, Онцгой байдлын газрын албан хаагчид хамтран цаг алдалгүй усанд автсан айл, өрхүүдээр орж яаралтай арга хэмжээ авч ажиллах,

Онцгой нөхцөл байдал үүссэн тохиолдолд Сургууль,цэцэрлэгийн удирдлагуудад мэдэгдэж дуудсан үед онцгой нөхцөлд ажиллах төлөвлөгөөний дагуу цаг алдалгүй бэлэн байх,

Үерийн даланг засварлах тендер зарлагдаж "Хүслэнт бүтээмж" ХХК шалгарсан байна.