“EZNIS Airways” компани өнөөдрөөс /2024.07.10/ Чех улсын Прага хот руу хуваарьт нислэгээ эхлүүлж байна. Тус компанийн Улаанбаатар-Прага-Улаанбаатар чиглэлийн анхны нислэг 17:15 цагт “Чингис Хаан” олон улсын нисэх буудлаас хөөрнө. Уг нислэг хийгдэж эхэлснээр Прагыг зоригсод болон, Прагаар дамжин өнгөрч байгаа зорчигчид цаг хугацаа, зардлаа хэмнэх боломж бүрдэж байгаа юм. Хоёр талын нислэгийн үнэ өнөөдрийн байдлаар 2.500.000 төгрөгөөс эхэлж байгаа нь Монголыг Европтой холбосон жишиг үнээс 20 орчим хувиар хямд аж.

Чех улс бол аялал жуулчлалын цэг. “Vaclav Havel” эйрпорт нь хямд өртгийн агаарын тээвэрлэгчдийн зангилаа гэдгээрээ онцлогтой. Европын маш олон хямд өртгийн агаарын тээвэрлэгч Прага олон улсын нисэх буудал руу өндөр давтамжтай хуваарьт нислэг үйлддэг. "Vaclav Havel" эйрпортоор дамжин Европын 165 хот руу нисэх боломж ийнхүү нээгдэж байна.

Сонирхуулж хэлэхэд “EZNIS Airways” компани "Парис 2024" олимпийн наадмыг үзэгчдэд зориулж хөнгөлөлт зарлажээ. Олимп үзэгчид Прагаар дамжин нисэхийг хүсвэл шууд нислэгийн тийзээ 3+1 хөнгөлөлттэй үнээр худалдан авах боломжтой. Тийз борлуулалтын төвийн 11-333311 дугаарын утсанд хандан, тийзээ захиалах боломжтой хэмээн компанийн зүгээс тодотголоо. Уг хуваарьт нислэгийг долоо хоногийн Лхагва, Бямба гаригуудад хийх юм байна.

Хувийн хэвшлийн агаарын тээвэрлэгч анх удаа алсын зайн хуваарьт нислэг хийж байна

Салбарын хувьд хувийн хэвшлийн агаарын тээвэрлэгч анх удаа алсын зайн хуваарьт нислэг эхлүүлж буй нь энэ аж. “EZNIS Airways” компани нь "Korean Air", "Eva Air" зэрэг агаарын тээвэрлэгчдийн дараа Ази, номхон далайг Чех улстай шууд холбож байгаа гурав дахь агаарын тээвэрлэгч болж байна. Тус компани дөрөвдүгээр улиралд буюу өвлийн цагийн хуваариас агаарын хөлгийн паркаа өргөжүүлэх тал дээр анхаарахын зэрэгцээ Хонгконгийн хуваарьт нислэгийг сэргээх, ОХУ, Вьетнам, Солонгос улс руу шинэ чиглэл нээхээр ажиллаж эхэлжээ.