"The Hu" хамтлаг 2024 оны эхний тоглолтоо Австрали улсаас эхэлсэн бөгөөд энэ оны тоглолтуудаас хамгийн онцлох нь эх орондоо ирж бүрэн хэмжээний тоглолтоо анх удаа хийх гэж буй. Тодруулбал, Чингис хааны одонт "The Hu" хамтлагийн продюсер, хүннү рок урсгалыг үндэслэгч МУГЖ Б.Дашдондог болон The Hu Music Inc" мөн тус хамтлагийн АНУ дахь албан ёсны лэйблтэй харилцан тохиролцсоны үндсэн дээр "The Hu" хамтлаг ирэх долдугаар сарын 20-нд "АРА Фест 2024"-т ирж бүрэн хэмжээний шоу тоглолтоо хийхээр болсон.

Тус хамтлагийн тоглолт Монголын хамгийн том амьд хөгжмийн фестивалийн нэг гэдгээр онцлог. Тоглолтын эхний өдөр урилгаар тоглох уран бүтээлчид оролцох бол хоёр дахь өдөр "The Hu" хамтлаг өөрсдөө бүрэн хэмжээний тоглолт хийнэ.

Хоёр хоногийн өмнө тэд "Нар сар" бүрэн хэмжээний тоглолтоо толилуусан бол өчигдөр тэд үндэсний баяр наадмаа нээсэн билээ.

"𝐀𝐑𝐀 𝐋𝐈𝐕𝐄 𝐌𝐔𝐒𝐈𝐂 𝐅𝐄𝐒𝐓𝐈𝐕𝐀𝐋 𝟐𝟎𝟐𝟒" амьд хөгжмийн фестивальд Монголын амьд хөгжмийн домог болсон хамтлагууд болон орчин үеийн рок хөгжмийн урсгалын шинэ залуу үеийн шилдэг төлөөллүүд нэгэн тайзнаа хоёр өдрийн турш доргиох болно. Энэ жилээс амьд хөгжмийн фестивалийг зорин ирэх үзэгчдэд Улаанбаатараас нэгдсэн унаагаар үйлчлэх аж.

Хоёр өдрийн тасалбар 140 мянган төгрөг.

"The Hu" хамтлагийнхан "Rumble of Thunder" нэртэй хоёр дахь цомгоо худалдаанд гаргаад буй. Шинэ цомогт "Учиртай гурав", "Шихихутаг", "Татар дайчин", "Хар аянга", "Байгаль эх" гэх мэт нийт 13 дуу багтсан.

Хамтлагийн залуус 2016 онд байгуулагдсанаасаа хойш богино хугацаанд олон улсад танигдаж чадсан Монголын амжилттай хамтлаг юм. Их эзэн Чингис хааны мэндэлсний ой, өвлийн тэргүүн сарын шинийн нэгэн Монгол бахархлын өдөр /2019.11.27/  "The Hu" хамтлагийнханд Монгол төрийн дээд шагнал, тэргүүн зэргийн Чингис хаан одонг хүртээсэн билээ. Анх 2005 оноос Чингис хаан одонг олгож эхэлсэн бөгөөд энэ жил “Хүннү рок” урсгалаар уран бүтээл туурвидаг “The Hu” хамтлагийн продюсер Б.Дашдондогт тус одонг гардуулсан юм.