"Би энэ зааландаа долоо хоногийн гурван өдөр нь бэлтгэлээ хийдэг юм. Эмэгтэй хүн, ээж хүн гэхээрээ л дандаа өөрийгөө хойш тавьж болохгүй. Би одоо дөрвөн хөөрхөн хүүхдийн ээж, завгүй гэрийн эзэгтэй ч дуртай зүйлийнхээ төлөө цаг гаргаад л явж байна" гэх энэ дайчин эмэгтэйг Б.Шинэчимэг гэдэг. Тэрбээр 39 настай бөгөөд пауэрлифтингийн тамирчин.

"Анх 2021 онд бага хүүхдээ төрүүлээд фитнес зааланд орж үзэж байлаа. Тухайн үедээ алдарт эхийн 2-р одонгоо авахдаа жингээ хасах зорилготойгоор хичээллэж эхэлсэн. Энэ спортоор хичээллэх тусам улам сонирхож, 2022 оноос "Стронг" клубт элсэн орж, энэ спортод эргэж буцалтгүй дурласан" тухайгаа тэрбээр хэлж байв. Тэрбээр энэ хугацаанд улсын аварга шалгаруулах тэмцээнүүдэд тасралтгүй оролцож, бага багаар амжилтаа ахиулжээ. Эхний жилдээ мөнгөн медаль хүртэж, бүр цаашлаад Ази тивийн аваргын шахалтын хүрэл медаль, Ази тив болон Далайн орнууд Африк тивийн аварга шалгаруулах тэмцээний эмэгтэй Классик хэвтээ шахалтын насанд хүрэгчдийн төрөлд мөнгөн медаль хүртсэн байна.

Б.Шинэчимэг "Бүх тэмцээн өөрийн гэсэн дурсамж үнэ цэнтэй байдаг. Миний хувьд хамгийн догдлол дүүрэн тэмцээн Хонконг хотод зохион байгуулсан Ази тив болон Далайн орнууд, Африк тивийн аварга шалгаруулах тэмцээн байсан. Анх удаа олон улсын тэмцээнд орж өөр улсын тамирчидтай өрсөлдөх мөн эх орноо төлөөлж байгаа гэдэг миний хувьд бахархалтай сайхан санагдсан" гэдгийг хэлсэн юм.

Тэрбээр "Бэлтгэлийн зааландаа орж ирээд л нийгмийн стресс уур бухимдал бүх зүйл мартагддаг. Би энэ зүйлээс таашаал авдаг энэ спортод дурладаг болохоор хичээллэж эхэлсэн цагаасаа шантармаар бууж өгмөөр санагдсан удаа огт байхгүй. Нөгөөтэйгүүр хөдөлгөөн хийж спортоор хичээллэх нь эрүүл мэнд бие галбирт маш сайнаар нөлөөлдөг" гэв.

Түүний хувьд өөрийн багш Х.Энхболд, Олон улсын хэмжээний мастер Д.Мөнхтуул, П.Бат-Амгалан багш мөн найз Н.Мөнхзул нарыгаа хүндэлж үлгэр дуурайлал авдаг гэнэ. Хүний амьдрал эрээнтэй бараантай хэцүү үед Н.Мөнхзул найз маань маш их сэтгэлийн дэм өгдөг тухайгаа ярилаа.

Б.Шинэчимэг "Анх бол гэр бүлийнхэн маань тийм ч дуртай байгаагүй ээ. Одоо бол намайг хамгийн сайн дэмждэг бас ойлгож хүлээн зөвшөөрдөг. Тамирчин эмэгтэйн хамгийн сайн ар тал нөхөр нь байдаг. Манай нөхөр чи өнөөдөр тэмцээнтэй юм чинь би тэр ажлаа зохицуулъя гэх мэт миний сонирхлыг үргэлж хүндэлдэг. Нөгөөтэйгүүр би ээж хүн гээд өөрийгөө хэзээ ч хаяж, хойш нь тавьж суух дургүй хамгийн гол нь цагийн менежмент өөрийнхөө цагийг хэрхэн зөв ашигтай зарцуулах вэ гэдэг чухал" гэдгийг яриандаа онцолсон юм.

Тэрбээр хүүхдүүдийнхээ бахархал. Ээжийнхээ медаль авсан зургийг ангийнхандаа харуулсан гээд л ам уралдан ярьцгаадаг аж. Тэрбээр "Зарим хүмүүс энэ спортоор хичээллэж буй тамирчдыг зүгээр төмөр өргөдөг гэх хандлага байдаг. Гэхдээ бид зөвхөн төмөр өргөх гэдэг зүйлийг голчилдоггүй. Энэ бүхний ард хүн өөрөө өөрийгөө ялах сэтгэл зүй бэлтгэлтэй болох, эрүүл амьдрах хэв маягт суралцах маш олон төрлийн ашиг тус бас хөдөлмөр байдаг" гэдгийг хэлж байв.

С.Нинжжаргал