Улсын гуравдугаар төв эмнэлэг, Хаан банк сан, Нийгмийн эрүүл мэндийн үндэсний төв, Монголын үндэсний олон нийтийн радио, телевизтэй хамтран Монгол хүн амын нийт нас баралтын тэргүүлэх шалтгаан болох зүрх судасны өвчлөлийн дийлэнх хувийг эзэлж буй цусны даралт ихсэх өвчин, түүнээс урьдчилан сэргийлэх, иргэд олон нийтийг цусны даралтын эрт илрүүлэг, төрөлжсөн мэргэшлийн эмчийн үзлэг оношилгоонд хамруулах, даралт ихсэлттэй хүн амын дунд тархины харвалт, зүрхний шигдээсийн хүндрэлээс хэрхэн урьдчилан сэргийлэх мэдлэг, хандлагыг дээшлүүлэх эрүүл мэндийн боловсрол, сургалт, сурталчилгааны үйл ажиллагааг зохион байгуулах зорилготой “Цусны даралт ихсэлтийн эсрэг аян”-ыг 2017 оноос хойш найм дахь жилдээ амжилттай хэрэгжүүлж буй юм.

Энэ онд “Цусны даралт ихсэлтийн эсрэг аян-2024”-ыг Зүүн бүсийн дөрвөн аймагт зохион байгуулах бөгөөд 07 сарын 28-наас наймдугаар сарын 3-ны өдрүүдэд Дорнод, Сүхбаатар аймаг, наймдугаар сарын 18-24-ний өдрүүдэд Хэнтий, Говьсүмбэр аймгуудад тус тус хэрэгжүүлэхээр төлөвлөөд байна.

Өнгөрсөн долоон жилийн хугацаанд “Цусны даралт ихсэлтийн эсрэг аян”-ыг Монгол Улсын 17 аймаг, Улаанбаатар хотод амжилттай хэрэгжүүлсэн бөгөөд нийтдээ 40,560 гаруй иргэнийг үзлэг оношилгоонд хамруулж, үйлчилгээний байгууллагуудыг түшиглэн цусны даралтын эрүүл мэндийн долоон булан байгуулж, цусны даралтын нотолгоонд суурилсан оношилгоо эмчилгээний менежмэнтийн чиглэлээр ажлын байрны чадавхижуулах сургалтад нийслэл орон нутгийн 600 гаруй эмч, эмнэлгийн мэргэжилтэнг хамруулаад байна.