Оросын арми Украин даяар томоохон халдлага үйлдэж, улмаар 33 хүний амь эрсэджээ. Мөн Киевийн хүүхдийн эмнэлэг халдлагад хамгийн их хохирол амссан байна. Тодруулбал, Орос Даваа гаригт Киев, зүүн хэсгийн Днепропетровск, Донецк зэрэг мужуудад нэгэн зэрэг халдлага үйлджээ. Киев хотын төвийн долоон дүүрэгт Орос пуужингаар цохилт өгснөөр байшин, барилгууд сүйрч, 22 хүн амиа алдаж, 70 гаруй хүн шархадсан гэж албаны хүмүүс мэдээлэв. Мөн халдлагад "Охмадыт" хүүхдийн эмнэлэг өртсөн ба дотор нь байсан  хоёр хүн амиа алдаж, 10 хүн шархадсан байна. Украины аюулгүй байдлын албаны мэдээлснээр, Орос далавчит пуужин ашиглан хүүхдийн эмнэлгийг сүйрүүлсэн.

Тухайн үед ажил үүргээ биелүүлж явсан эмч юу болсон талаар хэлэхдээ, "Гэнэт хүчтэй дуу сонсогдож бүх цонхны шил хагарч, нуранги үүссэн. Мөн хамтран ажиллаж байсан нэг эмч амиа алдсан байсан. Энэ бол дайны гэмт хэрэг. Хүүхдийн эмнэлэгт маш олон туслалцаа хэрэгтэй хүүхдүүд байсан" гэжээ. Оросын арми тус эмнэлэгт халдлага үйлдсэний дараа Украин харуй цохилт өгчээ. Тодруулбал, Даваа гаригаас Мягмар гаригт шилжих шөнө Украин Оросын эрчим хүчний байгууламж руу арав гаруй пуужингаар цохилт өгсөн. Улмаар нэг хүн амиа алдаж, хэдэн арван ажилтан хүнд бэртсэн ба ноцтой түймэр гарсан гэж албаны хүн мэдээлжээ.

Оросын Батлан ​​хамгаалах яам Даваа гаригт гаргасан мэдэгдэлдээ Украины цэргийн аж үйлдвэрийн байгууламж, агаарын баазуудад алсын тусгалын нарийвчлалтай зэвсгээр цохилт өгсөн гэв. Энэ нь Оросын нутаг дэвсгэр дээрх байгууламжуудад цохилт өгсөн Украинд хариу барьж буй үйлдэл гэж онцолсон байна. Харин, Украины агаарын цэргийн хүчнийхэн Оросын харвасан 38 пуужингаас 30-ыг нь устгаж чадсан гэж мэдэгдэв. Зеленский Даваа гаригт болсон халдлагын дараа Оросын эсрэг дэлхий нийтээрээ хамтрах хэрэгтэй байна гэж хэлсэн байна.

Эх сурвалж: REUTERS