Төр, хувийн хэвшил олон чиглэлд хамтран ажилладаг. Харин энэ дотор төр, хувийн хэвшлийн түншлэл гэдэг ойлголт нь олон улсад өргөн ашиглагддаг томоохон дэд бүтэц, төрийн үйлчилгээний төслүүдийг хэрэгжүүлдэг нэгэнт тогтсон нарийн зохицуулагдсан агуулгатай, арга хэрэгсэл юм.

Тухайлбал Дэлхийн банкны судалгаагаар 2022 онд нийт 263 төсөлд 91.7 тэрбум ам.долларын хувийн хэвшлийн хөрөнгө оруулалт татаж хэрэгжүүлсэн байна. Энэ ч утгаараа Монгол Улсад ч гэсэн олон улсын жишигт нийцүүлэн Төр, хувийн хэвшлийн түншлэлийн тухай хуулийг Засгийн газраас боловсруулж, УИХ-аар батлуулсан бөгөөд энэ оноос хэрэгжиж эхэлж байна. Энэ хуулийг хэрэгжүүлэх түншлэлийн асуудал эрхэлсэн төрийн захиргааны төв байгууллага нь Эдийн засаг, хөгжлийн яам бөгөөд бид өнгөрсөн жилийн хугацаанд бүх бэлтгэл ажлуудаа хангаж, төслүүдийг хүлээн авч, үнэлж эхлээд байна. Энэ хуулийн зорилт нь нийтийн зориулалттай дэд бүтэц, төрийн үйлчилгээний салбарт төр, хувийн хэвшлийн түншлэлийн төслийг хэрэгжүүлэх, хувийн хэвшлийн оролцоо, хөрөнгө оруулалтыг дэмжих, төр, хувийн хэвшил эрсдэлийн оновчтой удирдлагад суурилан түншлэлийн гэрээний дагуу урт хугацаанд үр ашигтай хамтран ажиллах болон санхүү, төсвийн зохистой удирдлагыг хэрэгжүүлэх эрх зүйн орчныг бүрдүүлсэн.

Улсын төсөв маань хязгаартай тул бидэнд хувийн хэвшлийн хөрөнгө оруулалтыг татаж, томоохон дэд бүтцийн төслүүдээ хэрэгжүүлэх, төр, хувийн хэвшлийн түншлэлийг хөгжүүлэх шинэ эрхзүйн орчин бүрдсэн тул манай яамны зүгээс шинэ хуулийн талаарх сургалт мэдээллийг хүргэх таниулах ажлыг үе шаттайгаар зохион байгуулж, холбогдох байгууллагуудын уялдаа холбоог хангах, зохион байгуулах ажлуудыг хийж ирсэн бөгөөд түншлэлийн төслийг хэрэгжүүлснээр хувийн хэвшлийн оролцоотойгоор олон нийтэд зориулсан нийтийн зориулалттай дэд бүтэц, төрийн үйлчилгээг чанарын өндөр түвшинд, хүртээмжийг ханган хүргэхээр ажиллаж байна. Дашрамд дурдахад уг хуулийн хүрээнд хувийн хэвшлээс ч гэсэн төсөл санаачлах боломж нь нээлттэй бөгөөд хуульд нарийвчлан зохицуулсан.