Тулгар төрийн 2233 жил, Их Монгол Улс байгуулагдсаны 818 жил, Үндэсний эрх чөлөө, тусгаар тогтнолоо сэргээн мандуулсны 113 жил, Ардын хувьсгалын 103 жилийн ойн баяр наадам, Монгол Улсад банкны систем үүсэж бэхэжсэний 100 жилийн ойг тохиолдуулан Монгол улсын ерөнхийлөгч Ухнаагийн Хүрэлсүхийн зарлигаар Ариг банкны гүйцэтгэх захирал Осордэлэгийн Хүрэлбаатарт Монгол Улсын Гавьяат эдийн засагч цол олголоо.

Осордэлэгийн Хүрэлбаатар нь 1962 онд Баянхонгор аймагт төрж 1970-1980 онд Баянхонгор аймгийн 1-р арван жилийн сургуульд бүрэн дунд боловсрол эзэмшин, 1980-1986 онд  Зөвлөлт Холбоот Улсын Москва хотын Олон улсын харилцааны дээд сургуулийг Олон улсын эдийн засагч мэргэжлээр суралцаж төгссөн. Олон улсын эдийн засгийн харилцааны магистр зэрэгтэй.

1986-1988 онд Үнэ, стандартын улсын хороонд мэргэжилтэн, 1988-1990 онд Улсын банкны ерөнхий хороонд нягтлан бодогч, дилер, ахлах дилер, 1990-2002 онд Худалдаа, хөгжлийн банканд хэлтэс, газрын захирал, Дэд захирал, Орлогч захирал, 2002-2009 онд Монгол шуудан банканд Гүйцэтгэх захирлын орлогч, 2009-2011 онд Хадгаламж банканд Гүйцэтгэх захирал, ТУЗ-ийн орлогч дарга, ТУЗ-ийн дэргэдэх Аудитын хорооны дарга, 2011-2013 онд “SGS” ХХК-д Засгийн газрын харилцаа хариуцсан зөвлөх, Капитрон банкны  ТУЗ-ийн дарга, гишүүн,  2013-2015 онд “Ачит ихт” ХХК-д Санхүү эрхэлсэн захирал, Капитрон банкны ТУЗ-ийн ердийн гишүүн, 2015-2021 онд Капитрон банканд Гүйцэтгэх захирал, Банкны зөвлөх, ТУЗ-ийн гишүүн, ТУЗ-ийн дэргэдэх Эрсдэлийн хорооны дарга, 2021-2022 онд Ариг банканд Гүйцэтгэх захирлын үүрэг гүйцэтгэгчийн албан үүргийг түр орлон гүйцэтгэгч, Дэд захирлаар ажиллаж байгаад 2022 оны 8 дугаар сарын 5-ны өдрөөс тус банкны Гүйцэтгэх захирлаар ажиллаж байна.

Тэрээр засаглалын хямралаас шалтгаалан алдагдалтай ажиллаж байсан Ариг банкийг удирдан банкны системд 37 жил ажилласан өөрийн мэдлэг ур чадвар, туршлага дээрээ тулгуурлан  үйл ажиллагааг нь тогтворжуулан харилцагч үйлчлүүлэгч, хадгаламж эзэмшигчдийн мөнгөн хөрөнгийг эрсдэлээс хамгаалж чадсан юм. О. Хүрэлбаатар захирлын хичээл зүтгэл мэргэжлийн өндөр ур чадвар нь ажилтан бүрийн идэвх, санаачлага, оролцоог нэмэгдүүлэн эрсдэлийн менежментийг сайжруулсан нь богино хугацаанд үр дүнгээ өгч,  банкны  үйл ажиллагааг хэвийн болгон, улмаар өргөжүүлэн хөгжүүлж, Банкны тухай хуульд заасан шалгуур үзүүлэлтүүдийг бүрэн ханган ажиллаж байна.  Ариг банкны актив хөрөнгийг 324%-иар өсгөж хагас их наяд гаруй төгрөгт хүргэн активын өгөөжийг хамгийн өндөрт байлган жилийн 17.6 тэрбум төгрөгийн ашигтай ажиллуулж, Монгол улсын банк санхүүгийн салбарт өрсөлдөхүйц хэмжээний банк болгосноос гадна түүний удирдаж  буй энэ хугацаанд Ариг банк анх удаа Монгол улсын ТОП100 аж ахуйн нэгжийн нэг болж чадсан юм.

Ийнхүү Ариг банкны гүйцэтгэх захирал О.Хүрэлбаатарт Монгол Улсад ажилласан 40 жил, банк санхүүгийн салбарт  37-н жилийн турш ажиллаж үнэтэй хувь нэмэр оруулсан, хийж бүтээсэн ололт амжилтууд, хичээл зүтгэлийг нь үнэлж Монгол Улсын Гавьяат эдийн засагч цол тэмдгийг хүртээлээ.

Гавьяат эдийн засагч О.Хүрэлбаатарт танд Ариг банкны хамт олны зүгээс халуун баяр хүргэж аз жаргал сайн сайхан бүхнийг хүссэн ерөөе!