Энэ жил Их Монгол Улс байгуулагдсаны 818 жил, Үндэсний эрх чөлөө, тусгаар тогтнолоо сэргээн мандуулсны 113 жил, Ардын хувьсгалын 103 жилийн ойн баяр тохионо. Монгол Улсын Бүх нийтээр тэмдэглэх баярын болон тэмдэглэлт өдрүүдийн тухай хуульд зааснаар Үндэсний их баяр наадмаар зургаан хоног амардаг болсон. Тус хуулийн 4.1.1-т зааснаар “Хуульд өөрөөр заагаагүй бол Үндэсний их баяр наадам, Ардын хувьсгалын ойн баяр: долдугаар сарын 10,11,12,13,14,15″ гэж заажээ. Үүний дагуу энэ жилийн наадмаар долдугаар сарын 10-15 өдрүүдэд бүх нийтээр амрах юм.

НААДМААР ХУВИАРАА ХУДАЛДАА ХИЙХ ХҮМҮҮСТ ЗӨВШӨӨРӨЛ ОЛГОХГҮЙ

Наадмын бэлтгэл ажлын хүрээнд Төв цэнгэлдэх хүрээлэнд 12 мянган суудал зассан бөгөөд хоол хүнс, худалдаа эрхлэгчдэд зориулж нэгдсэн төлөвлөлт хийн ажиллаж байгаа аж. Нийтдээ хоол хүнсний 177 асар, худалдаа эрхлэх 65 асрыг нэгдсэн зохион байгуулалттайгаар аж, ахуйн нэгж байгууллагуудад зориулж дэлгэхээр болжээ. Харин хувиараа худалдаа хийх хүмүүст зөвшөөрөл олгохгүй. Тодруудбал, баяр наадмын үеэр Нарантуул зах нүүж ирэхгүй гэдгийг хотын дарга Х.Нямбаатар онцолсон.

Хоол үйлдвэрлэл, худалдаа эрхлэгчид долдугаар сарын 1-ний 07:00 цагаас ulaanbaatar.mn сайтаар зөвшөөрөл авах боломжтой.

Мөн Хүй долоон худагт хуушуурын 200 орчим гэрт зөвшөөрөл олгоно. Харин хуушуурын худалдаа эрхлэх үедээ зүлгэн дээр тос асгасан тохиолдолд цагдаагийн байгууллагад мэдэгдэж, арга хэмжээ авах юм. Түүнчлэн Төв цэнгэлдэх хүрээлэнгийн баруун талд жижиг, дунд үйлдвэрлэл эрхлэгчдэд зориулж 40 асрыг бэлдсэн тухай албаныхан мэдээлсэн.

ХАМГИЙН ИХДЭЭ 5 ЗОГСООЛЫН ЭРХ ХУДАЛДАН АВАХ БОЛОМЖТОЙ

Энэ жил Төв цэнгэлдэх орчимд 7850 автомашины зогсоол төлөвлөсөн байна. Авто машины зогсоолын эрхийг www.enaadam.mn сайтаар худалдаална. Жолооч нийтдээ гурван төрлийн зогсоолоос сонгох боломжтой.