Украины эрчим хүчний байгууламж руу оросууд халдсаны улмаас баруун хойд Сумы мужид 100,000 хүн тог цахилгаангүй болжээ.
Оростой хиллэдэг Сумы хот болон бүс нутаг агаарын цохилтод өртсөний  дараа цахилгаан эрчим хүчийг сэргээх ажил хийгдэж байна гэж Үндэсний сүлжээний оператор Укренерго мэдэгдэв. Эрчим хүчний байгууламж сүйтгэгдснээс өөр хүний ​​амь нас хохирсон тухай мэдээлэл байхгүй гэж Ройтерс агентлаг мэдээллээ. Орос улс Украин даяар эрчим хүчний байгууламжуудыг онилсноос болж дайралтад өртсөн мужууд  ус, агааржуулагч, эмнэлгийн туслалцаа үзүүлж чадахгүй байдалд хүрээд байна.
Өнгөрсөн гурван сарын хугацаанд л гэхэд Украин есөн гигаватт цахилгаан эрчим хүч, бүх дулааны цахилгаан станцуудаа дайсны үйл ажиллагаанд алдаж, бүх усан цахилгаан станцууд нисгэгчгүй онгоц эсвэл пуужингийн цохилтод өртсөн гэж Укренерго мэдэгдэв. Польш улс Оросын цохилтыг даван туулахыг хичээж буй Украинд тусалж, илүүдэл цахилгаанаа шилжүүлж байгаа боловч дотоодын үйлдвэрлэл болон цахилгаан эрчим хүчний импорт алдагдлаа нөхөж чадахгүй байна.  Тиймээс Укренего улс орон даяар цахилгаан эрчим хүчийг бүтэн өдрийн турш таслахаар төлөвлөжээ. Укренергогийн Мария Цатурян “BBC”-д хэлэхдээ, түүний компани маш олон удаа, удаан хугацаагаар цахилгаан тасалж буйд үйлчлүүлэгчид их ууртай байгаагаа илэрхийлсэн. Гэхдээ өөр сонголт байхгүй гэв.
"Бид дайны байдалтай байна. Эрчим хүчний салбар бол Оросын террористуудын нэг зорилго юм. Бидний бүх амьдрал, бүх соёл иргэншил цахилгаан дээр тогтдог нь ойлгомжтой. Энэ бол бидний эрх чөлөөний төлөө төлж буй төлөөс" гэжээ.
Үүний зэрэгцээ, Украины агаарын довтолгооноос хамгаалах хүчнийхэн долдугаар сарын 5-6-нд шилжих шөнө Оросын хөөргөсөн 27 шахед камикадзе нисгэгчгүй онгоцноос 24-ийг нь устгасан гэж Агаарын цэргийн хүчний командлал “Telegram” дээр мэдээлэв.

Эх сурвалж: BBC