Шинэчлэгч Масуд Пезешкян хатуу үзэл баримтлалтай консерватив өрсөлдөгч болох Саид Жалилиг ялж, Ираны шинэ ерөнхийлөгчөөр сонгогдлоо.

Санал хураалтад 30 сая гаруй хүн оролцсон бөгөөд Пезешкян нийт саналын 53,3 хувийг авсан байна. Өрсөлдөгч Жалили нь  санал асуулгад 44.3 хувийн санал авчээ.

Сонгуулийн эхний шат зургадугаар сарын 28-нд болсон ч аль нэг нэр дэвшигч олонхийн санал авч чадаагүй ба сонгогчдын ирц дөнгөж 40 хувийг давж байжээ. Тиймээс хоёр дахь шатны санал хураалт явагдсан юм.
Өнгөрсөн тавдугаар сард Ираны өмнөх ерөнхийлөгч Эбрахим Раиси нисдэг тэрэгний ослоор амиа алдсан ба өөр долоон хүн түүнтэй хамт амиа алдсаны дараа сонгууль зарласан юм.

Ираны парламентын гишүүн, зүрхний мэс заслын эмч, 71 настай доктор Пезешкян Ираны ёс суртахууны цагдааг шүүмжилж, эв нэгдлийг улс эх орондоо амласан. Мөн, Ираныг дэлхийгээс "тусгаарлагдсан" байдлыг зогсооно гэдгээ илэрхийлсэн байдаг. Түүнчлэн 2015 онд гацсан цөмийн хэлэлцээрийг шинэчлэх асуудлаар барууны гүрнүүдтэй хэлэлцээ хийх тухай мөрийн хөтөлбөртөө тусгажээ.
Түүний өрсөлдөгч Саид Жалили статус квог дэмждэг. Цөмийн хэлэлцээний төлөөлөгч асан Ираны шашны олон нийтээс хүчтэй дэмжлэг авдаг. Жалили барууны эсрэг хатуу байр суурьтай бөгөөд цөмийн хэлэлцээрийг эсэргүүцдэгээрээ алдартай.
Хамгийн сүүлийн шатны санал хураалтын ирц 50 хувь байсан нь өнгөрсөн долоо хоногт болсон эхний шатны санал хураалтаас өндөр үзүүлэлт юм. Гэхдээ Исламын хувьсгалаас хойш сонгуулийн ирц тийм ч сайн байгаагүй юм.

Эх сурвалж: BBC