Путин шинэ энхийн төлөвлөгөөний дагуу Крымийн бүрэн эрхийг Украинтай хуваалцахад бэлэн байна. Тэрбээр дайныг зогсоох шинэ саналаа Дотоод хэргийн сайд Владимир Колокольцевоор АНУ рүү хүргүүлснийг эх сурвалжууд мэдээлэв.

Владимир Колокольцевт хориг арга хэмжээ авсан ч гэлээ НҮБ-ын цагдаагийн дарга нарын уулзалтад оролцохоор АНУ-д ирэхийг нь зөвшөөрчээ. Энэ нь цаагуураа энх тайвны хэлэлцээрийн бодит шаардлагыг АНУ-ын засгийн газарт дамжуулуулах башир арга байсан гэж үзэж байна. Тэрбээр ОХУ-ын ерөнхийлөгчийн флотын "VIP" онгоцоор Вашингтон руу явжээ.

63 настай Колокольцев Путины Дотоод хэргийн сайдаар 12 жил ажиллаж буй бөгөөд Оросын цагдаагийн газрыг хариуцдаг.

Шинэ энхийн төлөвлөгөө нь Путины тавдугаар сард танилцуулсан төлөвлөгөөнөөс арай өөр аж. Шинэ шаардлагын дагуу Украин довтолгоонд өртсөн газар нутгаа орхиж, НАТО-д элсэхгүй байх ёстой. Тэгэхээр энэ шаардлагыг Украин хүлээн зөвшөөрөхгүй байх магадлалтай.

Газар нутгийн шаардлагыг нарийвчлан танилцуулбал, Украин эзлэгдсэн Донецк, Луганск мужуудаас бүрмөсөн гарах ёстой. Харин Запорожье атомын цахилгаан станц болон ойролцоох Энерходар хотыг Украин авна. Херсон, Запорожье мужуудыг Украины мэдэлд шилжүүлэх эсэхийг ярилцана. Крымийн хувьд Украин, ОХУ-д давхар захирагдах засаг захиргааны нутаг дэвсгэр болно. Мөн Днепр мөрний дагуух 100 км цэрэггүй бүсийг Украин хянах аж.

НАТО-д элсэхийг хориглоно гэж шаардлагад тусгасан ч гэлээ Европын холбоонд элсэхэд нь саад болохгүй гэжээ.

Мөн барууны орнууд Оросын газрын тос, байгалийн хий, түүнчлэн банкны салбарт тавьсан хоригоо цуцлах ёстой.

Сонирхуулахад, Колокольцевын онгоц Вашингтонд ирэхэд АНУ-ын ерөнхийлөгч асан Дональд Трампын онгоц ойролцоо нь харагдсан байна.

Эх сурвалж: DAILY MAIL