Тойм: Л.Оюун-Эрдэнэ ерөнхий сайд болж, наадмын тасалбар зарагдаж дууслаа

Өнгөрч буй долоо хоногт өрнөсөн гол үйл явдлуудыг тоймлон хүргэе.

ФОТО: ШИНЭ ГИШҮҮД ТАНГАРГАА ӨРГӨЛӨӨ

2024 оны УИХ-ын сонгуулийн үр дүнд сонгогдсон гишүүд тангаргаа өргөж, анхдугаар чуулганаа хийлээ.Ингэснээр тэдний бүрэн эрх баталгаажиж байгаа юм. Гишүүд “Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрийн хуулийг дээдлэн сахиж, авлига, ашиг сонирхлын зөрчлөөс ангид байж, гишүүний үүргээ чин шударгаар биелүүлэхээ тангараглая. Миний бие энэ тангаргаасаа няцвал хуулийн хариуцлага хүлээнэ” гэж тангараглаж байгаа юм.

Фото цомгийн үргэлжлэлийг энд дарж үзнэ үү.

Л.ОЮУН-ЭРДЭНИЙГ ЕРӨНХИЙ САЙДААР ТОМИЛЛОО

УИХ-ын чуулганы нэгдсэн хуралдаанд оролцсон 103 гишүүний 100 хувийн саналаар Ерөнхий сайдаар Л.Оюун-Эрдэнийг томиллоо.

Л.Оюун-Эрдэнийг Ерөнхий сайдаар томилогдсонтой холбогдуулан тогтоол баталлаа. Тогтоол батлагдсан өдрөөс эхлэн хэрэгжиж байна. Ерөнхий сайд Л.Оюун-Эрдэнийн хувьд дахин Засгийн газрын танхимыг удирдахаар болж, эрхээ УИХ-аас авлаа.

Ерөнхий сайдын хэлсэн үгийг энд дарж үзнэ үү.

МЕТРОНЫ НЭГДҮГЭЭР ШУГАМЫН ЭРЧИМ ХҮЧНИЙ ХЭРЭГЛЭЭ 30МВТ БАЙНА

Улаанбаатар хотод их багтаамжийн нийтийн тээвэр буюу метро байгуулахад зөвлөх үйлчилгээг Өмнөд Солонгос улсын “Dohwa Engineering” компани шалгарсан. Тэгвэл өчигдөр /2024.07.05/ нийслэлийн Засаг дарга Х.Нямбаатар тус компанийн удирдлагуудтай менежментийн гэрээнд гарын үсэг зурлаа.

Үйл явдлын дэлгэрэнгүйг энд дарж үзнэ үү.

"НААДМЫН ТАСАЛБАР 1 ЦАГИЙН ДОТОР ЗАРАГДАЖ ДУУССАН"

Энэ жилийн Үндэсний их баяр наадмын тасалбарыг долдугаар сарын 1-нээс www.enaadam.mn сайтаар борлуулж эхэлнэ гэж албаныхан мэдээлсэн. Тэгвэл өнөөдөр /2024.07.01/ өглөөний байдлаар наадмын бүх тасалбар борлуулагдаж дууссан гэх мэдээлэл байна. Энэ талаар мэдээллийг www.е.naadam.mn сайтын гүйцэтгэгч компаниас тодруулахад "Наадмын тасалбар арван таван минутанд зарагдаж дууссан гэх мэдээлэл худлаа. Тасалбарыг 07:00 цагт худалдаж эхэлсэн. 08:00 цагийн байдлаар бүх билет зарагдаж дууссан. Системд ачаалал үүссэн. Нийслэлээс уг асуудалд нэгдсэн мэдээлэл өгөх тул, өөр асуултад хариулах боломжгүй" гэлээ.