ХҮН намын Төлөөлөх зөвлөл яг одоо хуралдаж байна. Энэхүү хуралдаанаар МАН, АН-тай хамтарсан Засгийн газарт ажиллах эсэх шийдвэрээ гаргах юм.

ХҮН намын дүрмийн дагуу Төлөөлөх зөвлөлд:

• Намын дарга
• Намын Ерөнхий нарийн бичгийн дарга
• Намын Удирдах зөвлөлийн гишүүн
• Намын нарийн бичгийн дарга
• Нийслэлийн намын хорооны дарга, дэд дарга
• Аймаг, дүүргийн намын хорооны дарга
• Монгол Улсын Их Хурал /УИХ/-ын гишүүн
• Монгол Улсын Засгийн газрын гишүүн
• Намаас төрийн улс төрийн албан тушаалд сонгогдсон болон томилогдсон гишүүн
• Аймаг, нийслэл, дүүргийн иргэдийн төлөөлөгчдийн хуралд төлөөлөгчөөр сонгогдсон гишүүдээс бүрддэг аж.

Монгол ардын намаас өчигдөр Засгийн газарт хамтран ажиллах хүсэлтээ Ардчилсан нам болон ХҮН намын удирдлагуудад хүргүүлсэн. Тиймээс АН-ын Улс төрийн зөвлөл уг асуудлаар өчигдөр хуралдаж МАН-тай хамтарч ажиллах боломжийн талаар хэлэлцэх шийдвэр гаргасан. Тэгвэл ХҮН намын Төлөөлөх зөвлөл яг одоо хуралдаж МАН-тай хамтарч ажиллах эсэх асуудлыг хэлэлцэж байна.

Тус намын дарга Т.Доржханд " МАН-аас Засгийн газарт хамтарч ажиллах санал албан ёсоор ирсэн. Маш олон шалтгаан дурдсан байсан. МАН олонх учраас засгаа байгуулахад асуудалгүй. Гэхдээ гадаад нөхцөл байдал, геополитикийн асуудлууд байна. Монгол Улс ардчиллаа бэхжүүлж авахын тулд хамтарч ажиллах боломж байна гэсэн санал ирүүлсэн. Бид саналыг хүлээж аваад Удирдах зөвлөл хуралдаж, дүрмээрээ шийднэ. Удирдах зөвлөл өнөөдөртөө багтаж хариугаа хэлнэ. ХҮН намын хувьд маш олон эдийн засагчтай, гадаад, дотоодын хамгийн сайн сургууль төгссөн туршлагатай  3000 эдийн засагч байна. Эдийн засгийн хүний нөөцөөрөө бусад намуудаа бодвол ХҮН нам илүү. Хэрвээ хамтрах шийдвэр гарвал өөрсдийн давуу талаа бодож, хувь нэмэр оруулж чадах зүйлээ хийнэ" гэсэн байр суурийг илэрхийлсэн юм.

Урьдчилсан таамаглалаар МАН-аас ХҮН намд Засгийн газарт нэг суудалд суух эрх олгох талаар яриа нийгэмд өрнөж байна. Тэр дундаа Эдийн засаг, хөгжлийн сайд Шадар сайд өгөх тухай яриа бий.