ХҮН намын дарга Т.Доржхандаас цаг үеийн асуудал болон Засагт хамтарч ажиллах талаар байр суурийг хүргэж байна.

ХҮН намын дарга Т.Доржханд:

 -Засгийн газарт хамтарч ажиллах санал албан ёсоор ирсэн. Маш олон шалтгаан дурдсан байсан. МАН олонх учраас засгаа байгуулахад асуудалгүй. Гэхдээ гадаад нөхцөл байдал, геополитикийн асуудлууд байна. Монгол Улс ардчиллаа бэхжүүлж авахын тулд хамтарч ажиллах боломж байна гэсэн санал ирүүлсэн. Бид саналыг хүлээж аваад Удирдах зөвлөл хуралдаж, дүрмээрээ шийднэ. Удирдах зөвлөл өнөөдөртөө багтаж хариугаа хэлнэ. Олон янзын байр суурь байгаа. Манай намын хувьд нам, хувь хүний эрх ашиг гэхээсээ илүү улс орны эрх ашиг нэгд гэсэн хатуу байр суурийг баримталдаг. Өмнөх дөрвөн жилийн хугацаанд улс орны эрх ашиг чухал гэж үзсэн учраас Үндсэн хуулийн тогтолцооны өөрчлөлтийн талаар яриад явж байна. Бид эдийн засгийн реформ хийх ёстой. Төрийг жижиглэх, төсвийн үргүй зардлыг хумих, төсвийн болон салбарын реформ гээд маш олон ажлуудыг энэ дөрвөн жилд хийх шаардлагатай байна. Хувь хүнийхээ зүгээс төрийг цомхотгох ёстой гэж бодож байна. Мөрийн хөтөлбөртөө бас тусгасан, энэ байр сууриа баримталж ажиллана. Хамтарсан Засгийн газар байгуулаад орон тоо, зардал өснө гэж бодохгүй байгаа. Одоохондоо хамтрах эсэхээ шийдээгүй байна. Эдийн засаг хөгжлийн сайдаар томилогдоно гэх яриа үндэслэлгүй. ХҮН намын хувьд маш олон эдийн засагчтай, гадаад, дотоодын хамгийн сайн сургууль төгссөн туршлагатай  3000 эдийн засагч байна. Эдийн засгийн хүний нөөцөөрөө бусад намуудаа бодвол ХҮН нам илүү. Хэрвээ хамтрах шийдвэр гарвал өөрсдийн давуу талаа бодож, хувь нэмэр оруулж чадах зүйлээ хийнэ. Албан тушаал, эрх мэдэл чухал биш. Иргэдийн цалинг хэрхэн нэмж болох ингэхийн тулд зах зээлийн орчныг яаж бүрдүүлэх гээд эдийн засгийг тэлэх цогц реформыг  хийх шаардлагатай. Үүн дээр хамтарч ажиллахаар болбол манай нам шийдвэрээ гаргавал, би үүнийг үгүйсгэхгүй” гэв.