Цаг агаар огцом халснаас үүдэлтэй ой, хээрийн түймэр Калифорни мужид жил бүр гардаг. Өнгөрсөн Пүрэв гаригт мөн адил хээрийн түймэр гарч, хойд Калифорни мужийн 28,000 гаруй хүнийг нүүлгэн шилжүүлсэн байна. Калифорнийн Ойн аж ахуй, гал түймрээс хамгаалах хэлтсийн (CalFire) мэдээлснээр, Томпсон түймэр гарсны дараах Пүрэв гаригт 28,000 орчим хүнийг нүүлгэн шилжүүлэх, сэрэмжлүүлэх тушаал авсан.

Тус мужид цаг агаар ирэх өдрүүдэд 47 хэм хүртэл халах төлөвтэй байна. Одоогийн байдлаар 74 барилга байгууламж түймэрт өртсөн ч нас барсан тохиолдол бүртгэгдээгүй байна. Томпсон түймэр гарсан газрын ойролцоох Оровилл хотод дахин түймэр дэгдэх эрсдэлтэй байна. Тиймээс тус хот  долдугаар сарын 4-ний Тусгаар тогтнолын баярыг цуцалжээ.

Түймрийг унтраахыг тулд 2,000 хүний бүрэлдэхүүнтэй гал унтраах баг ажиллаж байна. Гэхдээ дөнгөж түймрийн долоон хувийг унтрааж чаджээ. Аврах багын мэдэгдсэнээр, дөрвөн хүн ажиллагааны үеэр шархадсан. Сүүлийн гурван жилд Калифорнийн хойд болон төв хэсэгт шатсан талбайн хэмжээ 1996-2021 оны хэмжээтэй харилцуулахад тав дахин том юм. Хүний хүчин зүйлээс шалтгаалсан уур амьсгалын өөрчлөлттэй холбон ой, хээрийн түймэр дэгдэх нь ихэссэн гэж эрдэмтэд тайлбарлаж байна. Ирэх долоо хоногт Үндэсний цаг уурын албанаас хэт халж, халуун, хуурай цаг агаартай байхыг анхаарууллаа. Мөн хэт дулаан болж буй нь халууны стресс, өвчин тусах эрсдэлийг нэмэгдүүлдэг болхийг онцлов.

“CalFire”-ийн мэдээлснээр, зургадугаар сарын сүүлийн долоо хоногт Калифорни муж даяар 10 гаруй акр талбай шатаж, хорь орчим түймэр гарчээ. Хамгийн том нь буюу бараг 14,000 акр газар шатсан нь Фресно мужид байв.  Калифорнийн амбан захирагч Гэвин Ньюом нөөцийг хангах үүднээс Бьютт мужид онц байдал зарлав.

Эх сурвалж: BBC