"The Night with us" тоглолтын таван жилийн ойн баярын хүрээнд энэ удаагийн тоглолтдоо Монголын рок попын нэгэн цаг үеийг тэргүүлэгч домогт "Номинталст", "Камертон", "Никитон", "Хар сарнай" болон "3 охин" хамтлаг нэгэн тайзнаас үзэгч фенүүддээ хит 60 уран бүтээлээ толилуулаахаар болжээ. Тоглолт 2024 оны наймдугаар сарын 10-нд Төв цэнгэлдэх хүрээлэнд болох бөгөөд 15.00 цагаас үүд нээгдэж 18.00 цагт үндсэн тоглолт эхлэх гэнэ.

Ердөө ганц удаа тоглох тус тоглолтод "Хар сарнай" болон "3 охин" хамтлаг, "Камертон" хамтлагийн дуучин Д.Болд, "Номинталст" хамтлагийн дуучин Хаянаа болон Дээгий нар ганцаарчилсан уран бүтээлүүдээ мөн толилуулах аж.

"Номин талст"хамтлагийн дуучин А.Хаянхярваа “Наймдугаар сарын 10-нд болох тоглолт дээр та бүхэн маань оюуны өмчөөр баталгаажсан дуу сонсох болно" гэв.  Төв цэнгэлдэх хүрээлэнгийн захирал солигдож, менежмент өөрчлөгдсөн учраас өмнөх тоглолтуудаас илүү тав тухтай, ариун цэврийн өрөөний асуудал хүртээмжтэй байна гэдгийг зохион байгуулагчдын зүгээс онцоллоо.

Тоглолтод 60 гаруй дууг дуулах бөгөөд жинхэнэ фенүүдтэйгээ хамт нэгэн үдшийг аз жаргал, дурсамжаар дүүрэн өнгөрүүлэхээр уран бүтээлчид бэлтгэлдээ оржээ.

"Камертон" болон "Номинталст" хамтлаг өмнө нь Төв цэнгэлдэх хүрээлэнд 60 мянга гаруй үзэгчтэйгээр тоглож байсан түүхтэй.

Энэ удаагийн тоглолтод найруулагчаар "Фантастик" продакшны жүжигчин, найруулагч Б. Тамир ажиллаж буйгаараа онцлог юм.

Тасалбарыг shoppy.mn-ээс худалдан авах боломжтой.

С.Нинжжаргал