Японд өнгөрсөн оны хэмжээнд зөнөх өвчтэй 19 мянга гаруй хүн сураггүй болсныг цагдаагийн байгууллагаас мэдээллээ. Харамсалтай нь, тэдний 500 гаруйг нь нас барсан байхыг олсон байна. 19039 нь 2022 оноос 330-аар өссөн үзүүлэлт аж. Сураггүй болсон зөнөх өвчтэй хүмүүсийн мэдээллийг 2012 оноос нэгтгэж эхэлсэн бөгөөд өнгөрсөн оны тоон мэдээлэл хамгийн өндөр үзүүлэлт болж байна.

Өнгөрсөн оны тоон мэдээллийг задалж үзвэл, 18175 буюу нийт сураггүй бологсдын 95 хувь нь эсэн мэнд олджээ. Харин 502 нь нас барсан олдож, 250 нь олдоогүй хэвээр байна.

Харин байршлын хувьд авч үзвэл, Хёого мужид хамгийн олон буюу 2094 хүн алга болжээ. Үүний араас Осакад 2016, Сайтамад 1912 хүн алга болсон.

Сүүлийн 10 жилийн хугацаанд энэ төрлийн хэргийн тохиолдол бараг 80 хувиар өссөн учир орон нутгийн засаг захиргаа, нийгэмлэгүүдийг хамтарч ажиллахыг цагдаагийн байгууллагаас уриалж байна. Өвчтөн ар гэрийнхэн, аль эсвэл хотын захиргааны зүгээс байршил заагч төхөөрөмжийг хувцас, гутланд нь зүүж өгөх арга ч байдаг. Өнгөрсөн онд л гэхэд 71 хүнийг "GPS"-ын тусламжтайгаар олжээ. Сураггүй болсон өвчтөн гэрээсээ 300 гаруй км зайд олдсон тохиолдол ч гарсан байна.

Цаашид Японы цагдаагийн газар "GPS", дрон болон бусад дэвшилтэт технологи ашиглаж, сураггүй болсон хүмүүсийн байршлыг тогтоохоор ажиллаж байна.

Эх сурвалж: NHK