Усан хил дагуу хууль бусаар загасчилж байсан гэх үндэслэлээр Тайванийн завийг Хятад саатуулжээ. Тухайн хураагдсан завинд хоёр Тайвань, гурван Индонезийн иргэн байсан ба тэднийг баривчилсан байна. Завь болон хөлгийн гишүүдийг зүүн өмнөд хэсэгт орших Вейтоу боомт руу аваачсан бөгөөд тэднийг суллахыг Тайванийн эрх баригчид хүсчээ.  Хятадын нутаг дэвсгэрийн усан хил буюу эргээс 5,1 км зайд Тайванийн завийг саатуулсан байна. Хятадад жил бүр тавдугаар сараас наймдугаар сар хүртэл загасчлахыг хориглодог үед тухайн баривчлагдсан хүмүүс загас агнаж байжээ. Эргийн хамгаалалтын албаны төлөөлөгч Лю Дэжүн "Загас агнуурын хөлөг онгоц загасчлахыг хориглох журмыг зөрчиж, хориглосон бүсэд хууль бусаар нэвтэрсэн" гэж мэдэгджээ. Тэрбээр мөн буруу загас агнуурын хэрэгсэл ашиглаж, далайн загас агнуурын нөөцийг сүйтгэсэн гэж буруутгав. Тайвань эдгээр тайлбарт хараахан хариу өгөөгүй байна.
Хятадын эрх баригчид 2003 оноос хойш Тайваньд бүртгэлтэй 17 хөлөг онгоцыг зуны улиралд загасчлахыг хориглож, саатуулжээ. Тайвань мөн адил арга хэмжээ авсан.
Тайванийн эрх баригчид орон нутгийн цагаар Мягмар гаригийн 20:04 цагт Хятадын эргийн хамгаалалтын хоёр хөлөг онгоцны офицерууд загас агнуурын хөлөг онгоцонд сууж, барьцаалсан гэх мэдээллийг авсан. Тайванийн гурван эргийн хамгаалалтын хөлөг онго загас агнуурын завийг эргүүлэн авахаар очсон боловч Хятадын онгоц том усан буугаар бууджээ. Хурцадмал байдлыг улам өдөөхгүйн тулд Тайванийн эргийн хамгаалалтын хөлөг онгоцууд ухарсан аж.
Тайваньчууд чанга яригч ашиглан загас агнуурын завийг суллахыг шаардсан гэж Хятадын эргийн хамгаалалт мэдээлсэн. Хятадууд ч мөн адил арга хэмжээ авч, нөгөө талаас саад болохгүй байхыг хүссэн байна. Загас агнуурын хөлгийн эзэн хэлэхдээ, "Тухайн үед 40-50 загас агнуурын завь байсан. Яагаад миний завийг онилсныг мэдэхгүй байна. Өмнө нь Хятадын эрэгт тулах үед эргийн хамгаалалт нь хөөдөг байсан. Ийм зүйл хэзээ ч тохиолдож байгаагүй" гэжээ.  Бээжин, Тайбэйн эрх баригчид өмнө нь загас агнуурын тал дээр уян хатан шийдвэрүүд гаргадаг байсан. Гэвч сүүлийн жилүүдэд Хятадын эргийн Фужиан мужийн загасчдын хулгайн ан агнуурын тоо асар их нэмэгдэж байгаагийн хариуд Тайвань эргийн хамгаалалтаа чангалсан байдаг. Үүний хариуд Хятад мөн адил эргийн хамгаалалтаа чангатгасан байна.

Эх сурвалж: BBC