ЭШ-ыг долдугаар сарын 4-7-ны өдрүүдэд орон даяар зохион байгуулна. Энэ жил нийт 35939 шалгуулагч шалгалт өгөх бөгөөд үүний 32353 нь 2024 онд ЕБС төгсөж буй шалгуулагч байгаа аж.

3586 нь 2024 оноос өмнө Ерөнхий боловсролын сургууль төгссөн шалгуулагчид байна.

Нийт шалгуулагчдын 14812 нь Улаанбаатар хотод, 17541 нь орон нутагт шалгалт өгөхөөр бүртгүүлжээ. Түүнчлэн улсын хэмжээнд нийт 38 тусгай хэрэгцээт шалгуулагч шалгалт өгч байгаа бөгөөд тус элсэгчдийг БҮТ-д өгсөн өргөдөл, хүсэлтийн дагуу шалгалтын материалыг бэлтгэж, зохион байгуулж байна. Элсэлтийн шалгалтыг улс орон даяар нийт 46 шалгалтын байранд зохион байгуулах бөгөөд хөдөө орон нутагт 23, Улаанбаатар хотод 23 шалгалтын төв байна. Шалгалтын зохион байгуулалтад нийт 2541 багш, боловсролын байгууллагын алба хаагчид оролцож байна.

 Математик, физик, химийн шалгалтын үргэлжлэх хугацаа 100 минут, монгол хэл, англи хэл, орос хэл, биологи, газарзүй, түүх, нийгэм судлал шалгалтын үргэлжлэх хугацаа 80 минут.

Шалгалт дуусмагц, тусгайлан бэлтгэсэн шууд засалтын байранд тухайн шалгалтын хариултын хуудсыг шалгагч машинаар уншуулж, анхны оноог шууд мэдээлнэ. Хэмжээст оноог 24 цагийн дараа www.eec.mn цахим хуудсанд байршуулах юм. Элсэлтийн шалгалтын дүн оноо бүхий батламж хуудсыг www.eec.mn болон E-mongolia.mn цахим үйлчилгээний нэгдсэн порталд байршуулах ба дүн онооны жагсаалт зарласнаас хойш шалгуулагч өөрөө хэвлэж авах боломжтой.

ЭШ болон МХБШ-ын батламж хуудас нь шалгалт өгснөөс хойш 2.8 жил /33 cар/-ийн хугацаанд хүчин төгөлдөр байна.

Түүнчлэн элсэлтийн шалгалтын дүн оноог блокчейн сүлжээнд байршуулдаг болжээ. Энэхүү технологи нэвтэрснээр мэдээллийг тусгай технологиор шифрлэж хадгалах бөгөөд хэн нэгэн сүлжээнд бичигдсэн мэдээллийг өөрчлөх, устгах боломжгүй юм.

БШУЯ-ны сайдын 2024 оны хоёрдугаар сарын 16-ны өдрийн А/66 тоот тушаалаар батлагдсан "Элсэлтийн шалгалтын журам”-ын зургадугаар бүлэгт заасны дагуу гадаадын их, дээд сургуулиуд нийтлэг хүлээн зөвшөөрдөг Кембрижийн АЅ /advanced subsidiary/, A /advanced/, болон IB /international baccalaureate/ түвшний хөтөлбөр, мөн IELTS /International English Language Testing System/, TOEFL /Test of English as a Foreign Language/, SAT /Scholastic Aptitude Test/ зэрэг шалгалтын үнэлгээг 2024 оны гуравдугаар сарын 1-нээс зургадугаар сарын 15-ны хооронд ЭШ-ын үнэлгээтэй дүйцүүлсэн байна.

Улсын хэмжээнд нийт 3507 шалгуулагч, 5745 шалгалтын оноог дүйцүүлснээс SAT, IELTS оноог дүйцүүлсэн шалгуулагч илүү олон байна.

Түүнчлэн Монгол хэл бичгийн босго оноогоо даваагүй шалгуулагчдад зориулсан дахин шалгалт 2024 оны наймдугаар сарын 17-ны өдөр зохион байгуулагдана.