Монголын ард түмний тал буюу 50 хувь нь АН-д саналаа өглөө.

Өөрөөр хэлбэл, Монгол Улс Ардчилсан тогтолцоо, зах зээлийн тогтолцооноосоо буцахгүй гэсэн статистик үзүүлэлт юм. Азийн цээжинд мандсан Ардчиллын цэнхэр тугийг хамгаалж буй эрхмүүд бол Лу.Гантөмөр тэргүүтэй залуус. Тэд харуулын цэрэг бат бөх, сонор сэрэмжтэй, тэвчээртэй байж чадсан. Өдөр болгон Лу.Гантөмөр рүү довтолж цайзаа орхин тэвчээр алдахыг хүлээсэн. Бүр технологийн ололтыг ашиглан дайрсан. Ардчилал, технологийн ололт байгаагүй бол сумын төвийг гачгераас хэтрэхгүй нөхөд дайрсан, доромжилсон. Тэр залуус өөрсдийгөө доромжлуулахыг тоолгүй ардчиллаа хамгаалсан юм шүү. “Зарим хэрэгт уул мэт бат суу” гэдэг лугаа адил Гантөмөр улс төрд тэвчээр ямар хэрэгтэйг харуулж чадлаа. Жишээлэхэд, хүн амь эрсдэхэд “Гараад үзье” гэх хүмүүс их байв. Тэр ч бүү хэл АН-ын байр дээр эмгэнэл илэрхийлэхээр ирсэн Л.Оюун-Эрдэнийг үсдэж ирээд зодох тухай ярьж байлаа. Дорно дахины хүлээцтэй байдал “Баруун хацрыг чинь алгадах аваас зүүн талаа тавьж өг” цэцэн үг байдаг шиг Лу.Гантөмөр тийм хүлээцтэй нэгэн гэдгээ нотлов. Хүлээцтэй байна гээд хүн мууддаггүй, амаа хамхилаа гээд бүтэж үхдэггүй юм шүү. Сүүлийн долоо хоногт АН Засгийн газарт орох нь зөв буруу гэж Р.Чойномын хэлдэгчлэн “Хамтрал коммун байгуулна, байгуулахгүй гэж Мархайн Бат сүр бадруулан дэвж Шархайн Болд сүх барин дэлж” байх шив. Сүйрч буй эдийн засаг маань “Хамтаараа, нийтээрээ” гэсэн ойлголт руу чирч байна. ШХАБ-д ор гэж Орос Хятадгүй шахаж байгаа. Дундын ажиглагч энэ тэр шалтагаар хол явахгүй нь бололтой. Улс орон цахилгаангүй, нүүрээ зарах зах зээлгүй болохын цагт элсэхээс өөр аргагүй байдалд хүрнэ. Нөгөөтэйгүүр барууны хоригт ороод ирэхийн цагт Монгол Улс байх уу, үгүй гэсэн асуудал яригдах гэж байна. Энэ үед АН, МАН гэж хуваагдалгүй нэг амьсгаатай, цулаараа байх нь зөв болов уу. Нөхцөл байдал ийм дээрээ тулсан учир АН-ынхан Лу.Гантөмөрөө дэмжээд явах цаг болсон. Тэдний баг 11 гишүүнтэй байсан бол парламентаа 42 болголоо. Үүнийг амжилт гэж үзээд өөр хоорондоо бужигнах бус биднийг арчих гэсэн “хар хүчтэй” тулах цаг ирлээ. Тэр цаг дор Лу.Гантөмөр шиг хүлээцтэй, хүний үг даах улс төрчтэй байгаадаа баярлах болно. Дээр дооргүй, дэлхий дахинаараа хүлээцтэй байх цаг үе ирчихээд байна шүү.