Евро 2024 тэмцээн шувтарч, шилдэг найман баг туналаа. Шөвгийн наймын тоглолтууд маргааш/2024.07.05/ шөнө эхэлнэ. Үүнтэй холбогдуулан үлдсэн найман багийн ямар зам туулж, энд хүрснийг эргэн сануулъя.

АНГЛИ

С хэсгийн тэргүүн баг

• 1-0 Серби
• 1-1 Дани
• 0-0 Словени

Шөвгийн 16

• 2-1 Словаки (Нэмэлт цагт хожсон)

Шөвгийн найм

• vs Швейцарь (2024.07.07-ны өдрийн 00:00 цагт)

Английн шигшээ баг энэ Еврод унтаа, уйтгартай тоглолт үзүүлж байна гэж шүүмжлэл хүртсэн. Түрүүлж гоол оруулвал арагш сууж хамгаалдаг, алдвал тэнцүүлэх гэж зүдэрдэг тэд ямартай ч энд хүрлээ. Дасгалжуулагч Гарет Саутгейт ч гараандаа дорвитой өөрчлөлт хийгээгүй л явна. Энэ байдлаараа Швейцарийг давна гэдэгт нь олон хүн итгэхгүй байгаа. Уг нь Английн сэлгээнд нөлөө үзүүлчих хэмжээний бүтэн баг бий. Ирэх тоглолтод ямар өөрчлөлт хийх вэ гэдэг нь сонирхол татаж байна. Харри Кэйн ч сайн тоглолтоо эргүүлэн авчрахгүй бол бараг хөлс гаргахгүй бусдынхаа ачаар энд хүрчихлээ. Одоо л хэргээ гаргахгүй бол Саутгейтээс гадна Кэйн шүүмжлэлийн бай болох биз.

ФРАНЦ

D хэсгийн дэд байр

• 1-0 Австри
• 0-0 Нидерланд
• 1-1 Польш

Шөвгийн 16

• 1-0 Бельги

Шөвгийн найм

• vs Португал (2024.07.06-ны өдрийн 03:00 цагт)

Английн адилаар Францын шигшээ ч нэг л сайнгүй харагдана. 2012 оны Еврогоос хойш анх удаагаа хэсгээ тэргүүлж чадсангүй. Мбаппе торгуулийн цохилтоос гоолдсоныг эс тооцвол гоолын ган гачигт нэрвэгдээд байна. Угтаа довтолгоонд идэвх, санаачлагатай, хөдөлгөөнтэй байгаа ч аз дутах шиг. Дидье Дешамын удирдлага дор Францын шигшээ хоёр дэлхийн аваргын, нэг Еврогийн финалд хүрээд буй. Ямартай ч яван чангарч Бельгийг буулган авсан.

ГЕРМАН

А хэсгийн тэргүүн баг

• 5-1 Шотланд
• 2-0 Унгар
• 1-1 Швейцарь

Шөвгийн 16

• 2-0 Дани

Шөвгийн найм

• vs Испани (2024.07.06-ны өдрийн 00:00 цагт)

Талбайн эзэд давах ёстой даваа, хожих ёстой тоглолтууддаа хожсоор Испанийн өмнө ирлээ. Швейцарийн эсрэг барьц алдсаныг нь эс тооцвол өөлөх зүйл байгаагүй. Нагельсманн ч бүрэлдэхүүнээ бүрэн ашиглахгүй, зарим хөзрөө нуусаар л байгаа. Хэзээ гаргах нь мэдэгдэхгүй ч Испанийг давахын тулд бүхнээ зориулна. Мөн Жамал Мусиалаг магтах нь зүйтэй. Дөрвөн тоглолтод гурван гоол оруулсан гэхээр аргагүй багийнхаа гол хүн болжээ. Хамгаалалтын тухайд ч Рудигерын нуруун дээр гол ачаа ирж буй. Ирэх тоглолтод Испанийн "хүүхдүүдийг" хэрхэн зогсоох вэ гэдэг анхаарал татаж байна.

НИДЕРЛАНД

D хэсгийн гуравдугаар байр

• 2-1 Польш
• 0-0 Франц
• 2-3 Австри

Шөвгийн 16

• 3-0 Румын

Шөвгийн найм

• Турк (2024.07.07-ны өдрийн 03:00 цагт)

Зангарагтай, чансаатай Нидерландын шигшээг гуравдугаар байраар хасагдах шатанд шалгарсан гэхээр гайхмаар. Гэхдээ хэсгийн багуудыг нь харахаар арга ч үгүй юм шиг. Гуравдугаар байраар шалгарсан нь ч зол гэлтэй эхлээд Румынтай одоо Турктай таарлаа. Бусад томчуудтайгаа харьцуулахад арай зөөлөн учраануудтай. Энэ Еврод Годи Гакпо бас л сайн тоглолтыг гаргаж байна. Ер нь дэлхийн аварга, Еврод гялалздаг хөлбөмбөгчин бололтой. Энэ Еврогийн дөрвөн тоглолтод гурван гоол шигтгэв.

ПОРТУГАЛ

F хэсгийн тэргүүн баг

• 2-1 Чех
• 3-0 Турк
• 2-0 Гүрж

Шөвгийн 16

• 0-0 Словени (Торгуулийн цохилтоор Португал хожсон)

Шөвгийн найм

• vs Франц (2024.07.06-ны өдрийн 03:00 цагт)

Чехийг эцсийн мөчид номхотгож, Турк, Гүржийн эсрэг ид хаваа гайхуулсан Португалын шигшээ Словенийн эсрэг бүдрэх дөхсөн. Роналдо хүртэл торгуулийн цохилтоо алдаж, нулимс дуслуулав. Гэхдээ хаалгач Диегу Кошта гайхалтай хаалтуудын ачаар ялалт байгуулсан. Сонирхолтой нь Роналдо одоог хүртэл гоолгүй явна. Магадгүй Францын эсрэг чухал тоглолтод хэрэгтэй гоол оруулах биз.

ИСПАНИ

В хэсгийн тэргүүн баг

• 3-0 Хорват
• 1-0 Итали
• 1-0 Албани

Шөвгийн 16

• 4-1 Гүрж

Шөвгийн найм

• Герман (2024.07.06-ны өдрийн 00:00 цагт)

Үнэнийг хэлэхэд Ла Роха энэ Еврогийн хамгийн сайн баг байна. Өөлөх зүйл үнэндээ алга. Ганц алдсан гоолоо хүртэл өөрсдөө санамсаргүй байдлаар оруулсан гэхээр тэдний хамгаалалтыг сэтэлсэн баг хараахан гарсангүй. Ламинь Ямал, Нико Уиллиамс хоёр ч ирлэсэн тонгорог шиг хурц, урдаа байгаа хамгаалагч бүхнээ хяргачих шахам байна. Довтолгоонд нь ч Алвара Мората олдсон боломжоо олон алдахгүй хийх ёстой ажлаа хийж буй. Төвд нь хүртэл Родри гэхээр санаа зовох зүйл бага бий. Тэд дөрвөн удаа Еврод түрүүлсэн анхны баг болж чадах уу?

ШВЕЙЦАРЬ

А хэсгийн дэд байр

• 3-1 Унгар
• 1-1 Шотланд
• 1-1 Герман

Шөвгийн 16

• 2-0 Итали

Шөвгийн найм

• vs Англи (2024.07.07-ны өдрийн 00:00 цагт)

Швейцарийн шигшээ баг энэ Еврод хожигдол гээчийг амсаагүй явна. Италийг хожиж, Германыг сандаргасан гэхээр битүү морьд гэсэн үг. Тэдний сөрөг довтолгоо энэ тэмцээний хамгийн аюултайд тооцогдоно. Дуа, Варгас, Эмболо гээд хурдтай залуус Английн хамгаалалтыг үймүүлэх нь дамжиггүй. Абишер, Шака, Аканжи, Шаар гээд туршлагатай залуус Швейцарийг том амжилтад хөтлөх магадлалтай.

ТУРК

F хэсгийн дэд байр

• 3-1 Гүрж
• 0-3 Португал
• 2-1 Чех

Шөвгийн 16

• 2-1 Австри

Шөвгийн найм

• vs Нидерланд (2024.07.07-ны өдрийн 03:00 цагт)

Туркийн шигшээ баг тааварлахад хэцүү тоглолтыг үзүүлж байгаа. Өөрсдийгөө л хорлочихгүй бол ямар ч багийн эсрэг сайн тоглох нь харагдсан. Төвийн хамгаалалтыг нь эс тооцвол бусад байрлалд чадварлаг тоглогчид бий. Сайн мэдээ нь ирэх тоглолтод Хакан Чалханоглугийн шийтгэл дуусч, эргэн ирнэ.