УИХ-ын сонгуулийн үр дүнд байгуулагдсан 126 гишүүнтэй парламентын гишүүд тангараг өргөж, бүтэц бүрэлдэхүүний асуудлууд олны анхаарлын төвд байна. МАН олонх болж дангаараа Засгийн газраа байгуулах боломжтой болсон ч АН, ХҮН намтай хамтарч эвслийн Засгийн газар байгуулах боломжийн талаар ярилцах боломжтой гэдгээ илэрхийлсэн.

Тухайлбал, МАН-ын Удирдах зөвлөлийн хуралдаанаар тус намын дарга Л.Оюун-Эрдэнэ, УИХ-ын дарга Д.Амарбаясгалан, МАН-ынЕерөнхий нарийн бичгийн даргын үүрэг түр гүйцэтгэгч Я.Содбаатар нарын бүрэлдэхүүнтэй ажлын хэсэг байгуулж, 126 гишүүнтэй парламент байгуулсантай холбоотой бусад нам, эвслүүдтэй зөвшилцөх, дараагийн шинэ Засгийн газрыг байгуулах, Засгийн газрын мөрийн хөтөлбөр, бүтэц бүрэлдэхүүний талаар бусад нам эвсэлтэй зөвшилцөх ажлын хэсэг байгуулсан.

Уг ажлын хэсгээс  АН болон ХҮН намд ямар санал тавьснаас олон зүйл шалтгаална. Урьдчилсан байдлаар энэ удаагийн Засгийн газар 25 яамтай байхаар төлөвлөсөн бөгөөд МАН-16, АН-8, ХҮН намд-1 сайдын суудал хуваарилсан гэх эх сурвалжийн мэдээлэл бий.  Тэгвэл МАН-аас АН болон ХҮН намд Засгийн газраа хамтарч байгуулах талаар албан ёсны саналаа өнөөдөр хүргүүлэх бөгөөд  Ардчилсан намын Улс төрийн зөвлөл хуралдах товтой байна.

Улс төрийн намууд ямар хариу өгөхөөс шалтгаалан МАН-ын Удирдах зөвлөл дахин хуралдах юм.