Францын Үндэсний Ассемблейн эхний шатны санал хураалтад Марин Ле Пен тэргүүтэй цагаачлалын эсрэг Үндэсний Ралли нам 34 хувийн санал авч,  ялалт байгуулсан. Дараагийн шат долдугаар сарын 7 буюу энэ Ням гаригт болно. Энэ шатанд Марин Ле Пений нам дахин ялалт байгуулбал 28 настай Жордан Барделла ерөнхий сайд болох нь баараггүй аж.

Францын ерөнхий сайд 35 настай Габриэль Аттал одоогоор дэлхийн хамгийн залуу Засгийн газрын тэргүүнд тооцогдож буй. Ньюс агентлаг энэ удаагийн ХҮМҮҮС булангаараа Габриэль Атталын рекордыг эвдэх магадлалтай гэж яригдаад буй Жордан Барделлаг онцолж байна.

Итали цагаачийн хүү Жордан Барделла 1995 онд Францын Иль-де-Франс мужид цагаачид хамгийн олноор аж төрдөг Дрансид төржээ. Барделлаг нэг настай байхад аав, ээж нь салсан аж.Түүний ээж нь ундааны автомат машины жижиг бизнес эрхэлдэг байв. Харин аав нь баячуулын амьдардаг Монтморенси дүүрэгт бизнес эрхлэн амьдардаг байжээ. Барделла амралтын өдрүүд болон Лхагва гаригуудыг аавындаа өнгөрөөдөг байсан. Гэвч өөрийнхөө түүхийг ярихдаа аавыгаа орхигдуулдаг гэж түүнийг шүүмжлэгсэд ч бий.

Бага насныхаа тухай дурсан ярихдаа тэр хотын захын асуудал ихтэй хороололд өссөн, хүчирхийлэлд байнга өртдөг байсан гэсэн байдаг. Гэхдээ тэр хувийн дунд сургуульд сурж, төлбөрийг нь аав нь төлдөг байжээ.

Тэрбээр Жан-Батист-де-Ла-Салле хувийн лицейд эдийн засаг, нийгмийн шинжлэх ухааны чиглэлээр сурч төгсчээ. Улмаар Парисын Сорбонны их сургуульд газарзүйн чиглэлээр суралцсан боловч улс төрд илүү сонирхолтой байсан тул сургуулиа орхисон гэдэг.

16-ХАН НАСТАЙ УЛСТӨРЧ

Барделла 2012 онд буюу 16-хан насандаа Үндэсний Ралли намын гишүүн болжээ. Ингэхдээ намын төлөө гэхээсээ илүү Марин Ле Пений төлөө элссэн гэдэг. Улмаар 2014 онд 19 настайдаа хэлтсийн нарийн бичгийн даргаар томилогдсоноор намын түүхэн дэх хамгийн залуу албан тушаалтан болжээ.

Барделлаг анх намд элсдэг жил Марин Ле Пен Францын ерөнхийлөгчийн сонгуульд бүдэрч, гуравдугаарт орж байв. 2017, 2022 оны сонгуулиудаар Марин Ле Пен амжилтаа харьцангуй ахиулсан боловч яагаад залуу Барделлаг сонгох болов? Тэрбээр илүү залуу нэр дэвшигчийг намын даргаар томилох тактикийн шийдвэрээ 2022 онд гаргажээ. Энэ нь түүнд 2027 оны ерөнхийлөгчийн сонгуулийн кампанит ажилд анхаарлаа төвлөрүүлэх боломж олгох юм. Ле Пен түүнийг ирээдүйд хийх сайн хөрөнгө оруулалт гэж үзсэн.

Зарим хүн түүнд Ле Пений "арслангийн зулзага" гэсэн өхөөрдөм хоч хэдийнэ өгөөд амжжээ.

Тэрбээр 2019 онд намын хоёрдугаар дэд ерөнхийлөгч, 2021 онд нэгдүгээр дэд ерөнхийлөгчөөр тус тус томилогдсон. Дэд ерөнхийлөгчөөр томилогдохдоо Европын түүхэн дэх хамгийн залуу хоёр дахь Европын парламентын гишүүн болсон юм.

УЛС ТӨРИЙН ҮЗЭЛ БАРИМТЛАЛ

Тэрбээр нэгэнтээ “Франц алга болж байна” гэж хэлсэн нь олны анхаарлыг ихээхэн татсан. “Манай соёл иргэншил устаж үгүй болно. Яагаад гэвэл манай соёл иргэншил бидний зан заншил, соёл, амьдралын хэв маягийг эргэлт буцалтгүй өөрчилсөн цагаачдын далайд живэх болно” гэж тэр хэлжээ.

Үндэсний Ралли нам сонгуульд ялсан тохиолдолд францын иргэдийг үргэлж нэгдүгээрт тавихаа амласан. Барделлагийн удирдлага дор Үндэсний Ралли нам франц иргэдийн нийгмийн халамжийг нэн тэргүүнд тавихаар зорьж байна.

2019 оны Европын сонгуулийн кампанит ажлынхаа үеэр Барделла улс төрийн тэргүүлэх чиглэлээ цагаачдын хямрал, байгаль орчны хямрал гэсэн хоёр зүйлээр тодорхойлсон.

Цагаачдын хямрал нь нэн ялангуяа байгаль орчны хямралаас ч өмнө тавих ёстой асуудал гэж тэр үздэг. Дээр дурдсанчлан цагаачлал нь Францын өвөрмөц байдал, бүрэн эрхт байдлыг устгана гэж тэр үздэг. Мөн Европын холбоо эдгээр үнэт зүйлсийг улам доройтуулж байна гэж тэр үздэг ажээ.

Одоогийн ерөнхий сайд Габриэль Аттал хамгийн залуу удирдагч гэдгээс гадна ил тод зарласан ижил хүйстэн гэдгээрээ ялгардаг. Тэгвэл Барделла ижил хүйстнүүдийн гэрлэлтийн тухайд эсэргүүцсэн үзэл бодолтой. Ижил хүйстнүүдийн гэрлэлт нь тээгч эх болон эмнэлгийн тусламжтай нөхөн үржихүйг илүү түгээн дэлгэрүүлнэ гэж тэр үздэг ажээ.

ТҮҮНИЙ ТУХАЙ СОНИРХОЛТОЙ БАРИМТ

Жордан Барделла залуусыг уриалахын тулд ТикТок болон бусад олон нийтийн платформ дахь 1.5 сая дагагчаа ашигласан. Үндэсний Ралли намын арга хэмжээ болгоноор Барделлатай сельфи хийхийг хүссэн залуус түүнийг шавж харагддаг.

Барделла 2020 оноос хойш Нолвенн Оливьер гэх эмэгтэйтэй болзжээ. Нолвенн Оливьер нь Марин Ле Пений эгч Марье Каролин Ле Пений охин юм. Энэ хэргээс болоод Үндэсний Ралли нам дотор хамаатан садангийн хэлхээтэй холбоотой хэл ам ч гарч байжээ.