Уругвай руу нисч явсан "Air Europa"  компанийн онгоц Даваа гаригт агаарт хүчтэй донсолсны улмаас хэд хэдэн зорчигчийн хүзүү, гавлын яс хугарч, цуурчээ. Нийт 30 гаруй хүн бэртсэний улмаас онгоц Бразилд ослын буулт хийхээс өөр аргагүй болсон байна.

Тодруулбал, "Boeing  787-9 Dreamliner" загварын "UX045"  нислэг Испанийн Мадрид хотоос Уругвайн Монтевидео руу явах замдаа шуургатай тааралдаж, хүчтэй донсолсон. Зорчигчдод эмнэлгийн тусламж үзүүлэхийн тулд Бразилын Натал хотод газардсан байна. "New York Times" сонины мэдээлснээр, 36 аялагч биедээ гэмтэл авч, сэтгэл санаа нь цочирдсоны улмаас эмчлүүлж, 23 зорчигч эмнэлэгт хүргэгджээ. Эмчлүүлсэн зорчигчдын дийлэнх нь бага зэргийн гэмтэл авсан бөгөөд суудлаасаа шидэгдсэн хүмүүс нь хүнд бэртэл авсан байна.

Орон нутгийн эрүүл мэндийн албаны мэдээлснээр, "UX045"  нислэгийн зорчигчдыг Натал хотод газардах үед нь 15 түргэн тусламжийн машин зэрэг ирсэн. Дөрвөн зорчигч эрчимт эмчилгээний тасагт эмчилгээ хийлгэсэн бол өөр нэг зорчигч ерөнхий эмчилгээний тасагт хэвтэн эмчлүүлж байна. Ослын үеийн бичлэг болон гэрэл зургуудаас харахад онгоцны тээш хадгалах хэсэг болон дээвэр эвдэрч, бүхээгийн хонгилын дээгүүрх хэд хэдэн самбар унажээ. Зорчигчдод агаарын донслолт болох үед аюулгүйн бүсээ зүүхийг уриалсан эсэх нь тодорхойгүй байгаа аж. "Air Europa"  компани зорчигчдоос болон тэдний ар гэрээс уучлалт хүсч, түргэн эдгэрэхийг хүсчээ.

Эх сурвалж: GLOBAL NEWS